АҚШнинг Калифорния штатида собиқ ва амалдаги ўқитувчилар маҳаллий таълим тизимини судга берди. Ўқитувчилар тизимни бу штатдаги кўплаб мактаб ўқувчилари ўқишнинг бошланғич кўникмаларига ҳам эга эмаслигида айбламоқда. Бу ҳақда Los Angeles Times’га таяниб, «ТАСС» хабар берди.
Даъвогарлар номидан бир йўла иккита юридик фирма иш олиб бормоқда. Фирмалар кўрсатилган айбларни Калифорния штатининг таълим ишлари бўйича бошқармасига, таълим вазирлигига ва штатнинг ўқув муассасалари инспектори Том Торлексонга қўйган. Даъво аризасида кўрсатилишича, уларнинг барчаси штат қонунчилигини бузган, чунки улар «штатдаги ҳар бир болага савод чиқариш имкониятини яратиб бера олмаслигини оммавий равишда намоён қилган».
Мактаб ўқувчиларининг саводхонлик даражаси кўрсаткичлари энг ёмон бўлган 26 та тумандан 11 таси АҚШнинг аҳолиси энг кўп бўлган Калифорния штатида жойлашган. Аҳоли сони бўйича иккинчи ўринда турадиган Нью-Йорк штатида эса бундай туманлар сони атиги иккитани ташкил қилади. Учинчи ўринда турувчи Техасда эса бундай туманлар умуман мавжуд эмас.
Бир нечта ўқув муассасаларида юзага келган вазиятни кўрсатиш учун даъвога Лос-Анжелесдаги мактаблардан бирининг ўқувчилари кўрсаткичи илова қилинган. Бу мактабда ўтган ўқув йилида 179 та ўқувчидан атиги саккизтаси талаб қилинадиган ўқиш кўникмаларини ўзлаштирган. Даъвогарларнинг фикрича, вазиятни ўқитувчилар тайёрлаш тизимини яхшилаш ва қўшимча ресурслар ажратиш йўли билан ўнглаш мумкин.
Изоҳ (0)