2018 йил Жанубий Кореяда ўтадиган қишки Олимпиада ўйинларида Россия байроғи бўлмайди. Бу ҳақда «Meduza» Халқаро олимпия қўмитаси матбуот хизматига асосланиб хабар берди.
Россиялик спортчилар Олимпиадага ташриф буюриш истагида бўлса, улар олимпия ҳалқачалари туширилган нейтрал байроқ билангина мусобақага қўйилиши мумкин. Аммо бунинг ҳам бир қатор шартлари мавжуд. ХОҚ Россияда антидопинг масаласи билан боғлиқ муаммолар ҳукумат даражасида қўллаб-қувватланганига оид далиллар топганидан кейингина шундай қарорга келди, дейилади ташкилот сайтида.
Далиллар сабаб ХОҚ шундай қарорлар чиқарди:
- Россия спортчилари олимп ҳалқачалари туширилган нейтрал байроқ остида мусобақага қўйилиши мумкин. Шунингдек, Олимпиадада Россия мадҳияси янграмайди, унинг ўрнида олимпия мусиқаси эшиттирилади. Россиялик спортчилар либосига «россиялик олимпия спортчиси», деб ёзилади.
- ХОҚ талабига кўра, Олимпиадада иштирок этишга ҳақли деб топилган спортчилар алоҳида комиссия текширувидан ўтади. Улар шу вақтга қадар допинг билан боғлиқ масала шубҳасида кўрилмаган бўлиши керак. Олимпиада олдидан бу спортчилар ХОҚ талаби билан тест топшириши шарт.
- Жамоанинг техник қисмида кимлар бўлиши ва қайси амалдорларнинг унга бош бўлиши масаласини ХОҚ ҳал қилади. Сочи Олимпиадасида иштирок этган раҳбарлардан бирортасига ҳам Жанубий Кореядаги Олимпиадада иштирок этиш учун рухсат берилмайди. Бу ҳолат допинг шубҳасида бўлган спортчиларнинг мураббий ҳамда шифокорларга ҳам тегишлидир.
- Россия спорт вазирлигидан ҳеч кимга Олимпиада—2018 учун аккредитация берилмайди. Собиқ спорт вазири Виталий Мутко ҳамда унинг собиқ ёрдамчиси Юрий Нагорних Олимпиада ўйинларидан умрбод четлаштирилган. Россия МОҚ раиси Александр Жуков эса ХОҚ аъзолигидан ўчирилган.
- Шунингдек, Россия томони 15 миллион доллар тўлаб бериши керак. Бу пуллар антидопинг суриштируви лойиҳаси учун сарф этилган маблағ ўрнини қоплайди ва тўғридан-тўғри допинг-тести бўйича мустақил ташкилотга (ITA) йўлантирилади.
- Россия Олимпия Қўмитасининг ХОҚдаги аъзолиги вақтинча тўхтатилади. Ташкилот Пхенчхандаги Олимпиаданинг ёпилиш маросими олдидангина аъзоликка қайтарилиши мумкин.
«Meduza»нинг ёзишича, россиялик спортчилардан кимларнинг Олимпиадага бориши ва кимларнинг бормаслиги ҳозирча маълум эмас. Норасмий маълумотларга кўра, ХОҚнинг мазкур қарори юзасидан Россия президенти Владимир Путин бугун — 6 декабрь куни ўз позициясини баён қилади. Россия Давлат Думаси депутатлари эса Олимпиадага нисбатан бойкот эълон қилишга чақирмоқда.
Изоҳ (0)