Саудия Арабистонининг валиаҳд шаҳзодаси Time журнали ўқувчилари талқинига кўра «Йил одами» бўлди

Саудия Арабистони валиаҳд шаҳзодаси Муҳаммад бин Салмон ал Сауд Time журнали муштарийлари талқинига кўра «Йил одами» бўлди, деб хабар беради «ТАСС».

Америкада чоп этиладиган нашр томонидан ўтказилган сўровнома натижалари журнал сайтида эълон қилинди.

Ўтган ойда ўз мамлакатида коррупцияга қарши курашувчи кампанияни йўлга қўйган монарх учун муштарийларнинг 24 фоизи овоз берган.

Рейтингнинг иккинчи ўрнидан 6 фоиз овоз билан #Metoo («Мен ҳам») хэштеги жой олди. Мазкур хэштег жинсий зўравонликка учраган ижтимоий тармоқлар фойдаланувчилари томонидан мазкур иллатга қарши курашиш учун фойдаланилган.

Учинчи ўринни эса 5 фоиз овоз билан Дреамерс — АҚШ ҳудудига болалигида келган ноқонуний муҳожирлар эгаллаган.

Россия президенти Владимир Путин муштарийларнинг уч фоиз овозини қўлга киритган.

У бешинчи ўринни Германия канцлери Ангела Меркель, Франция президенти Эммануэль Макрон ва Рим папаси Франциск ҳамда таниқли америкалик телебошловчи Жимми Киммел билан бўлишган.

Трамп 2 фоиз овоз билан олтинчи ўринни забт этган.

Маълумот учун, Time 1927 йилдан бери «Йил одами»ни аниқлайди.