Тошкент вилоятининг Тошкент туманида ўтказилган тадбирлар давомида айрим фуқаролар томонидан ўз уйларида вақтинча рўйхатга қўймасдан, пропискасиз шахсларни моддий манфаатдорлик эвазига яшаб туришига йўл қўйганлиги аниқланди. Бу ҳақда Тошкент вилояти ИИБ матбуот хизмати хабар берди.
Ушбу турар-жойларда умуман шарт-шароитлар яратилмаган. Бино ҳолати санитария-гигиена қоидаларига жавоб бермайди. Бу эса шу ерда вақтинча яшаб келаётган фуқароларнинг соғлигига жиддий таъсир кўрсатади.
Ёнғин хавфсизлиги қоидалари қўпол равишда бузилган. Бу ерда ўрнатилган иситиш мосламалари электр ва газ тизимларига белгиланган талаб даражасида уланмаган.
Жумладан, Тошкент тумани, Келес шаҳри, Тинчлик МФЙда 1954 йилда туғилган нафақахўр А.I. хонадонини «меҳмонхона»га айлантириб, бир неча йилдан бери турли вилоятдан келган шахсларни рўйхатсиз ижарага қўйган. У ҳар бир «мижоз»дан кунига 5000 сўмдан 7000 сўмгача ижара ҳақи олган.
Шунингдек, ушбу Тинчлик МФЙда яшовчи яна бир фуқаро — 1976 йилда туғилган Т.I. ҳам хонадонини «меҳмонхона»га айлантириб, кунига ҳар бир кишидан 7000 сўмдан ижара ҳақи олган.
Ўтказилган тадбирлар давомида Тинчлик маҳалла фуқаролар йиғинининг ўзида бу каби қонунбузарликларнинг бир нечтаси аниқланди
Шу билан бирга ушбу манзилда шахсни тасдиқловчи ҳужжатларсиз бир нечта эркак ва аёллар вақтинчалик истиқомат қилаётганлиги маълум бўлди.
Тадбир давомида Тошкент вилояти ИИБ соҳавий хизматлари ходимларининг ҳамкорлигида Тошкент туман ИИБга жами 52 та шахс олиб келинди. Улардан 15 нафар аёллар ва 37 нафар эркакларни ташкил этади. Ушбу шахслар билан профилактик суҳбатлар ўтказилди, қонуний тартибда фаолият юритишнинг асослари тушунтириб ўтилди.
Изоҳ (0)