Бухоро – Мискин темир йўли қурилишининг биринчи босқичи якунига етди. 1 декабрь куни янги темир йўлни фойдаланишга топшириш маросими бўлиб ўтди. Бу ҳақда «Ўзбекистон темир йўллари» АЖ ахборот хизмати маълум қилди.
Иншоотни ўз муддатида фойданишга топшириш учун 1500 дан ортиқ ишчи-хизматчи, йўл қурилиши билан боғлиқ соҳа мутахассислари, 1000 дан ошиқ механизм жалб этилди. Қурилиш-монтаж жараёнлари Бухоро туманидан Мискин бекатигача бўлган оралиқда, бир вактнинг ўзида ҳар икки томонда олиб борилди.
«Боштранслойиҳа» акциядорлик жамияти томонидан лойиҳалаштирилган янги темир йўлнинг умумий узунлиги 355 километрни ташкил этади. Айни пайтда 335 километрга пўлат излар ётқизилди, 20 километрда тўлиқ таъмирлаш ишлари амалга оширилди. Шунингдек, мазкур йўналишда 121 та сунъий иншоот, 12 та кўприк ва 6 та йўл ўтказгич қуриб битказилди. 5 та бекат ва шунча разъезд барпо этилди.
Дастлаб мазкур темир йўл орқали юк поездлари қатнови амалга оширилади. Бу эса ушбу ҳудуддаги қазилма бойликларни ўзлаштириш, улардан самарали фойдаланиш, янги ишлаб чиқариш корхоналарини очишга замин яратади. Шу кунга қадар пойтахтдан Урганчга қатновчи поездлар 1064 километр йўл босиб, «Навоий — Учқудуқ — Мискин» магистрали орқали ҳаракатланаётган бўлса, ушбу лойиҳа якунига етиши билан поездлар қатнови қарийб 100 километрга яқин қисқарди.
Айни пайтда мамлакат темир йўлларининг умумий узунлиги 6500 километрдан ортиқ бўлса, Бухоро — Мискин темир йўли фойдаланишга топширилгандан сўнг бу кўрсаткич салкам 7000 километрга етади. Ушбу темир йўлнинг иккинчи босқичида электрлаштириш ишлари амалга оширилиб, келгусида у орқали электрпоездлар қатнови амалга оширилиши кўзда тутилган.
Изоҳ (0)