Ўзбекистоннинг АҚШга тайинланган фавқулодда ва мухтор элчиси Жавлон Ваҳобов АҚШ президенти Дональд Трампга ишонч ёрлиғини топширди. Маросим Америка раҳбарининг расмий қароргоҳи — Оқ уйда бўлиб ўтди, деб хабар берди «Жаҳон».
Тадбирдан сўнг бўлиб ўтган суҳбат чоғида Дональд Трамп сўнгги йилларда Ўзбекистонда амалга оширилаётган саъй-ҳаракатлар, «республиканинг реал ислоҳотларни ўз олдига мақсад қилганини тасдиқлашини» маълум қилди. Ўзбекистон томонидан ташланган қадамлар, жумладан, миллий валютанинг конвертациясини таъминлаш халқаро инвесторларни ўзига жалб қила бошлади.
Америка маъмурияти раҳбари болалар меҳнатининг йўқ қилиниши ва давлат бошқаруви тизимининг ошкоралигини таъминлашда эришилган натижаларни алоҳида қайд этди.
АҚШ президенти Ўзбекистон — Америка муносабатларини янада мустаҳкамлашга тайёр эканлигини тасдиқлади. Унинг сўзларига кўра, икки мамлакатнинг ўзаро кўплаб манфаатлари мавжуд. «Вашингтон кучли ва мустақил Ўзбекистонни қўллаб-қувватламоқда, бу минтақавий ҳамкорлик ва Афғонистондаги вазиятни барқарорлаштириш йўлларини очиб беради».
АҚШ минтақадаги мамлакатларнинг муносабатларини яхшилашга ҳисса қўшган Ўзбекистоннинг «яхши қўшничилик сиёсати»ни мамнуният билан қабул қилгани таъкидланди. Расмий Тошкент томонидан Қирғизистон билан чегаранинг катта қисмини делимитация қилишга қаратилган чора-тадбирларнинг самарадорлигига алоҳида эътибор қаратилди.
Изоҳ (0)