Ўзбекистон мусулмонлари идораси тасарруфидаги диний таълим муассасаларида «Қуръони карим ва тажвид» ҳамда «Араб тили» фанлари бўйича пулли ўқув курслари фаолият бошлаши ортга сурилди. Бу ҳақда идора матбуот хизмати хабар берди.
«Ўзбекистон мусулмонлари идорасининг 2017 йил 13 ноябрдаги буйруғига асосан идора тасарруфидаги диний таълим муассасаларида 2017—2018-ўқув йилининг 1 декабридан бошлаб ‘Қуръони карим ва тажвид’ ҳамда ‘Араб тили’ фанлари бўйича ўқув курслари фаолият бошлаши ҳақида маълум қилинган эди. Мазкур хабар эълон қилинганидан сўнг Ўзбекистон мусулмонлари идорасига кўплаб фуқароларимиз томонидан ёзма ва оғзаки мурожаатлар бўлди. Мутахассислар томонидан мурожаатлар ўрганиб чиқилиб, ташкил этилиши режалаштирилган курслардаги ўқиш муддати, ўқув режалари ва бошқа меъёрий ҳужжатларни қайта кўриб чиқиш, улар тасдиқлангач, бу ҳақда қўшимча эълон қилиш мақсадга мувофиқ эканига хулоса қилинди», — дейилади хабарда.
Курсларда ўқиш истагида бўлган фуқароларга Ўзбекистон мусулмонлари идорасининг www.muslim.uz сайтини кузатиб бориш тавсия этилди.
Изоҳ (0)