Мамлакатнинг биринчи шахсларини қўриқлаш билан шуғулланувчи АҚШ махфий хизмати Дональд Трамп президент бўлганидан буён гольф-карлар ижарага олиш учун салкам 145 минг доллар сарфлади. Бу ҳақда, USA Today’га таяниб, «ТАСС» хабар берди.
Таъкидланишича, Трамп ўзининг Палм-Бичдаги «қишки Оқ Уйи» — Mar-a-Lago’га (Флорида штати) келганининг дастлабки беш куни ичида махфий хизмат гольф-карлар ижараси учун 7,5 минг долларга яқин маблағ сарфлаган.
Трамп президент бўлгач, 100 кундан ортиқроқ вақтини оиласига тегишли кўчмас мулк ҳудудида ўтказган. Уларнинг 81 куни гольф-клублар ҳисобига тўғри келади.
Октябрь ойининг ҳисоб-китоблари бўйича махсус хизмат 63 минг доллардан ортиқ пулни Mar-a-Lago’га президент ва унинг оиласини ҳимоя қилиш бўйича тадбирларни амалга ошириш учун тўлаган.
Сентябрь ойида CBS телеканали Трампнинг тўнғич фарзандларини Аспенда (Колорадо штати) ҳордиқ чиқариши Америка солиқ тўловчиларига 330 минг долларга тушганини маълум қилганди. Гап Иванка Трамп, Эрика Трамп ва уларнинг турмуш ўртоқлари ҳақида кетмоқда. Хусусан, 26 минг доллар транспорт воситаларининг ижарасига, 22 минг доллар президент оиласи аъзоларини кузатиб боришда керак бўладиган зарурий қурилмалар учун ишлатилган. 195,7 минг доллар шаҳардаги меҳмонхоналардан хоналарни ижарага олиш учун сарфланган.
Президентнинг қизи ва куёви Канададаги Уистлер тоғ курортида дам олиши махсус хизмат учун 65 долларга тушган.
Изоҳ (0)