Нурсултон Назарбоевнинг кенжа қизи Алия Қозоғистондаги янги муассаса раҳбари этиб тайинланди

Остона шаҳрида Қозоғистон экологик ташкилотлари ассоциациясининг тақдимоти бўлиб ўтди, деб хабар беради «Казинформ».

Мазкур муассасага Қозоғистон президентининг кенжа қизи Алия Назарбоева раҳбар этиб тайинланди.

Ташкилот васийлик кенгашига «яшил» иқтисодиёт бўйича Нобель мукофоти совриндори Рае Квон Чунг ҳам киритилди.

«Қозоғистон экологик ташкилотлари ассоциацияси тизимли экологик ташаббусларни яратиш ва ривожлантириш ҳамда ‘яшил’ ҳаёт тарзини тарғиб этиш учун майдон бўлиб хизмат қилади. Муассаса экологик таълим ва тарбияга, миллатнинг экологик этикаси ва маданияти шаклланишига алоҳида эътибор қаратади. Биз жамиятда экологик маданият шаклланиши бўйича кўплаб ишларни амалга оширишимиз зарур. Биз фақат биргаликда сезиларли натижаларга эришишимиз мумкин. Фурсатдан фойдаланиб, барча шу соҳага қизиқувчи шахсларга эшикларимиз очиқлигини маълум қилмоқчиман», — дейди Алия Назарбоева.

Унинг сўзларига кўра, ҳозирга қадар Қозоғистондаги ўнлаб илмий-ишлаб чиқариш бирлашмалари ассоциацияга аъзо бўлиш истагини билдирган.