«Икки бор  шифохонадан қочиб келганди». Актёр Шуҳрат Нуралиев дўстларининг хотирасида

Актёр Шуҳрат Нуралиев 22 ноябрь куни вафот этди. Актёрнинг санъат оламидаги ҳамкасб дўстлари,  у ҳақдаги хотираларни журналист Феруз Муҳаммадга гапириб берди.

Раҳматли Шуҳрат Нуралиев  билан анча йиллик ижодий ҳамкор, дўст эдик. Юлдуз Усмонованинг сўнгги концерт дастурининг бош режиссёри Шуҳрат Нуралиев эди. Бирор бир ижодий режани ҳазиллашиб айтган тақдирингизда, ўша ишни ростдан ҳам амалга оширадиган, ўз устида ишлашдан чарчамайдиган, бутун жамоага кўтаринки кайфият улашадиган инсон эди. Фидойиликни қаранг, Юлдуз Усмонованинг концертга тайёргарлик жараёнида аҳволи икки маротаба оғирлашиб қолганида, бориб шифохонага жойлаштириб қайтсак-да, аввал ишни бажарайлик дея икки бор ҳам шифохонадан қочиб келиб, яна ишга киришиб кетган эди. Юлдуз Усмонованинг сўнгги вақтларда суратга олинган «Бинафша», «Кўнгил» деб номланган видео клипларининг режиссёри ҳам айнан Шуҳрат Нуралиев эди.

Мансур Агалиев, Юлдуз Усмонованинг продюсери

Шуҳрат Нуралиев институтда биздан бир курс юқори курсда ўқирдилар. Талабаликдан ҳар бир ишга жиддий эътибор бериб бажарадиган, бир жамоа бўлиб ишлайдиган инсон эдилар. Яқинда улар билан Қорақалпоғистон Республикасида тадбирда бирга юрганимизда болалигимизни, талабалик даврларни кўп хотирлаган эдик. Ўшанда «нима бунча озиб кетдингиз», дея савол берганимда,  «Шароф, инсультни бошимдан ўтказдим, бир томоним сал ишламай қолди, инфарктни ўтказиб юбордим, қандли диабетдан азоб чекяпман, шунга озиб кетдим» деган эдилар. Барча санъаткорлар вилоятлардаги тадбирларнинг биттасига бориб, биттасига бормасдан юрган вақтда, Шуҳрат ака бирорта вилоят тадбирини қолдирмасдан, барчасида иштирок қилган эдилар. «Шуҳрат ака чарчаб қолмаяпсизми» десам, «э Шароф, одамларнинг кўнглини кўтариш, улар билан бирга бўлиш, бу ҳам бир савобда, юрганинг қолар экан, кўнглини кўтарсанг, бир умр эслаб юради деб ҳамма вилоятга бораяпманда», деган эди. «Вилоятма-вилоят сафарда, тадбирда юриш бошқа ишларига халақит қилмаётганмикан», дея ўйлаб қолган эдим. Балки раҳматли ўшанда нималарнидир кўнгли сезгандир деб ҳозир ўйлаяпман.Шароф Муқимов, хонанда, Шуҳрат Нуралиевнинг дўсти

2008 йил, жазирама ёз. Суратга олиш майдонига ҳаммадан олдин келардинг. «Ҳааа, звездаларинг қани?», дердинг. «Мана ман турибман-у!», дердим. «Текстни оч», «Уйингда ёдлаб келсанг ўласанми?»... «Ман ёдлаганман, қолган ‘артисларинг’ қайтариб олсин»... 5 ёш кичкина эдинг а... жиддий... бачкана... ўзидан кетган... камтар... оқ кўнгил... ПРОФЕССИОНАЛ... «кастинг» (майдароқ ҳарф тополмадим) маҳсули эмас... Санъат институтини «тупроғини ялаган»... Ижодкор... изланувчан... Сценарийни ўқиб чиқиб, тунда телефон қилардинг. Костюм, юз ифодаси, қаҳрамоннинг тарихи, ички кечинмалари тўғрисида сўраб «жонга тегардинг»... Энг муҳими, кинога «осмон»дан тушмагандинг, эээ... энди буни сенга фарқи йўқ... биз эса ўша эски гаплар билан овворамиз... қўлимиздан келгани фақт дуо... «Мани қачон яна кинога оласан?»... «Санбоп рол ёзолмадим ҳали»... Энди ёзилмасаям керак...

Соҳиб Аббосхон, актёр, Шуҳрат Нуралиевнинг дўсти