Леонардо да Винчининг «Дунё қутқарувчиси» номли сурати сохта бўлиши мумкин. Британиянинг The Telegraph нашри гўёки асарнинг асл эканлигига шубҳа уйғотувчи тўртта сабабни келтирди.
Қайдномада кўрсатилишича, полотно тахминан 1500 йилда, 48 ёшли Леонардо оптик тасаввур ва нурнинг синишини фаол тадқиқ этган вақтида яратилган. Бироқ картинада Исо Масиҳ қўлидаги биллур шар ҳақиқатдан йироқ тарзда тасвирланган, чунки жисм орқасидаги объектлар мутаносиб эмас.
Иккинчи далил — полотнода Исонинг юзи олд томондан, тўғридан-тўғри тасвирланган, да Винчининг бошқа асарларида эса унинг қаҳрамонлари мураккаб ҳолатларда тасвирланган. «Дунё қутқарувчи»си кўпроқ бутни (икона) эслатади.
Мақола муаллифларида шубҳа уйғотган яна бир нарса — сурат бир нечта тарихга эга эканлиги. Улардан бирига кўра, полотно Карл II нинг коллекциясида сақланган. Шундан сўнг унга Букингем герцогининг ўғли эгалик қилган. Кейинроқ эса у вақти-вақти билан йўқолиб, аукционларда пайдо бўлиб турган.
Тўртинчи сабаб реставрацияга боғлиқ — сурат қайта тикланган ва унга тез-тез қўшимча деталлар чизиб борилгани сабаб унда да Винчи томонидан дастлаб чизилган деярли ҳеч нарса қолмаган бўлиши мумкин.
Эслатиб ўтамиз, «Дунё қутқарувчиси» картинаси Нью-Йоркда Christie’s аукцион уйи савдоларида 450 миллион долларга сотилган эди.
Изоҳ (0)