16—21 ноябрь кунлари Facebook ва бошқа ижтимоий тармоқларда Тошкент шаҳридаги, шунингдек, Тошкент вилоятининг Чиноз ва Янгийўл туманларидаги бир гуруҳ диндорларнинг уйларида ҳуқуқ-тартибот органлари ходимлари томонидан тинтувлар ўтказилгани, диндорларнинг ўзи сўроқ қилингани ҳақида хабарлар тарқалган эди.
Ушбу хабарларда ҳуқуқ-тартибот органлари Зангиота туманида уч кун ичида 20—60 ёш оралиғидаги 80 га яқин шахсни (эркак, аёл аралаш) қўлга олгани, улардан етти нафари Тошкент шаҳар ИИББ ҳибсхонасида сақланаётгани ёзилган. Бундан ташқари, Зангиотада қўлга олинган шахслардан Гўзал Тўхтахўжаева исмли фуқаро ҳақида ахборот сўралгани ҳам таъкидланган (UzNews’нинг ёзишича, Тўхтахўжаева 2008 йилдан бери, «Kun.uz» маълумоти бўйича эса — 2009 йилдан бери қидирувда).
Вазиятга ойдинлик киритиш мақсадида, Тошкент шаҳар ИИББ бошлиғи ўринбосари, Тергов бошқармаси бошлиғи Дониёр Тошхўжаев ОАВга ахборот берди, унинг ахбороти 25 ноябрь куни эълон қилинди.
Тошхўжаевнинг сўзларига кўра, 1986 йили Тошкент шаҳрида туғилган Гўзал Тўхтахўжаевага нисбатан Жиноят кодексининг 159-моддаси 3-қисми «б» банди (уюшган гуруҳ томонидан ёки унинг манфаатларини кўзлаган ҳолда Ўзбекистон конституциявий тузумига тажовуз қилиш) ва 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) аломатлари билан жиноят иши қўзғатилган ва у Учтепа тумани Тергов бўлими томонидан қидирувга берилган.
ИИББ бошлиғи ўринбосарининг таъкидлашича, ҳозирги вақтда Гўзал Тўхтахўжаевани қўлга олиш мақсадида ҳуқуқ-тартибот органлари ходимлари аёлнинг қидирувда эканини, унинг қаерда яширинаётганини билиши, шунингдек, у билан мулоқотда бўлиши мумкин бўлган, бироқ бу ҳақда ички ишлар органларига маълумот бермаган шахсларни сўроқ қилмоқда. Тошхўжаеванинг алоҳида қайд этишича, ҳуқуқни муҳофаза қилиш органлари ходимлари Гўзал Тўхтахўжаеванинг қаердалигини аниқлаш мақсадида Чиноз ва Янгийўл тумани аҳолисини сўроқ қилмаган.
25 ноябрь куни Тошкент шаҳар ИИББ сайтида Гўзал Тўхтахўжаева Учтепа тумани ИИБ томонидан қидирилаётгани ҳақида ахборот пайдо бўлди. ИИББ сайтидаги хабарга гумонланувчининг суратлари ҳам илова қилинган.
«Гўзал Тўхтахўжаевани кўрганлар ёки унинг қаерда эканлигини билганларни 102, 281-93-02, 281-92-80, 283-94-45, 284-93-23 телефон рақамларига ёки яқин атрофдаги ички ишлар органларига хабар беришини сўраймиз», — дейилади ИИББ ахборотида.
Изоҳ (0)