Ўзбекистондаги ҳар бир меҳмонхонада Қуръон, жойнамоз ва қибла кўрсатгичи бўлади

Ўзбекистондаги ҳар бир меҳмонхонада 2018 йил 1 январдан бошлаб Қуръони карим, жойнамоз ва қибла кўрсатгичи бўлиши лозим. Бу ҳақда «Azon.uz» хабар бермоқда.

Хабар беришларича, Ўзбекистон Туризмни ривожлантириш давлат қўмитасининг «Туристик хизматларни сертификатлаштириш маркази» давлат унитар корхонаси меҳмонхоналар фаолиятини тартибга солувчи янги давлат стандартларини ишлаб чиққан.

Ўзбекистон мусулмонлари идораси маълумотига кўра, 2018 йил 1 январдан кучга кирадиган янги талабларга мувофиқ, мамлакатдаги ҳар бир меҳмонхонада умумий хоналар сонининг ўндан бирида Қуръони карим, ибодат қилиш учун жойнамоз бўлиши, хоналарнинг камида 30 фоизида эса қибла кўрсатгичи бўлиши шарт.

Диний идоранинг алоҳида қайд этишича, ушбу янги талаблар Ўзбекистонда зиёрат туризмини янада ривожлантириш, ташриф буюраётган зиёратчиларга қулайлик яратиш мақсадида ишлаб чиқилган.

Аввалроқ Тошкент халқаро аэропортида намозхона очилгани ҳақида хабар берилган эди.