Ўзбекистон Президенти Шавкат Мирзиёев Синайда 24 ноябрь куни юз берган теракт муносабати билан Миср президенти Абдулфаттоҳ Ас-Сисийга ҳамдардлик билдирди. Бу ҳақда Ўзбекистон Президенти матбуот хизмати хабар бермоқда.
«Ўзбекистон Президенти Шавкат Мирзиёев Мисрнинг Синай ярим оролида содир этилган террорчилик ҳаракати оқибатида кўплаб тинч аҳоли, хавфсизлик ходимлари қурбон бўлганлиги муносабати билан ушбу мамлакат президенти Абдулфаттоҳ Ас-Сисийга ҳамдардлик билдирди», — дейилади расмий ахборотда.
Эслатиб ўтамиз, 24 ноябрь куни Синай яримороли шимолидаги Бир ал-Обид шаҳридаги жомеъ масжидида «ИШИД» террорчилик ташкилотига алоқадор жангарилар томонидан теракт амалга оширилган эди.
Маълумотларга кўра, 25—30 нафар атрофидаги террорчи тўрт йўлтанламасда масжидга келиб, аввалига портлаш уюштирган, сўнг масжид ташрифчиларига қарата ўт очган.
Миср расмийларига кўра, террорчилик ҳужумида қатнашган жангарилар йўқ қилинган. Уларни йўқ қилиш бўйича операцияда дронлардан фойдаланилган.
Теракт оқибатида, сўнгги маълумотларга кўра, 305 киши ҳалок бўлган. Ҳодиса муносабати билан Мисрда уч кунлик умуммиллий мотам эълон қилинган.
Изоҳ (0)