КХДР ўз ҳарбий хизматчиси Жанубий Кореяга қочиб ўтганидан сўнг, Умумий хавфсизлик зонасида хизмат ўтаётган барча чегарачиларни алмаштирди. Бу ҳақда Meduza хабар бермоқда.
ABC News’нинг аниқлик киритишича, чегаранинг ушбу қисмида 35—40 нафарга яқин шимолий кореялик ҳарбий хизматчилар навбатчиликда туради.
«Вазиятдан келиб чиқиб, мазкур бўлинма қўмондонлиги ва катта офицерлар жазоланиши мумкин», — деди Жанубий Кореянинг Yonhap агентлиги манбалари.
Агентлик суҳбатдошларининг қўшимча қилишича, Шимолий Корея томони ўз ҳарбий хизматчиси чегарадан қочиб ўтиш вақтида ўтган кўприкни ҳам ёпиб қўйган.
Бундан ташқари, баъзи маълумотларга кўра, КХДР бошқа қочиб ўтиш ҳолатларига йўл қўймаслик мақсадида, Умумий хавфсизлик зонасига юборилаётган ҳарбий хизматчиларни текширишни кучайтирган.
Жанубий Корея Мудофаа вазирлиги ва БМТ қўмондонлиги расмий вакиллари чегарачилар алмаштирилгани ҳақидаги хабарларни ҳозирча тасдиқлай олмаслигини маълум қилган.
13 ноябрь куни шимолий кореялик ҳарбий хизматчи Умумий хавфсизлик зонасидаги чегара орқали қочиб ўтган эди. 24 ёшли КХДР ҳарбийси қочиб ўтиш вақтида бир неча тан жароҳати олган, бироқ омон қолган.
БМТ қўмондонлиги вакилларининг қайд этишича, қочоқни тўхтатишга уринган КХДР ҳарбий хизматчилари сулҳ шартларини бузган, чунки улар Жанубий Корея назоратидаги ҳудудга кириб келган, шунингдек, Умумий хавфсизлик зонасида қурол ишлатган.
Изоҳ (0)