Сайёрашунослар Марснинг шимолий яримшарида йирик муз қатламлари ва эриган сувлар оқимининг изларини аниқлади. Сув оқимлари Ерда динозаврлар яшаган эрада юзага келган. Бу ҳақда «РИА Новости» хабар бермоқда.
Буюк Британиядаги очиқ университет олими Францес Бутчернинг айтишича, Марс юзасида ўртача ҳарорат Цельсий шкаласи бўйича 55 даража совуқдан кўтарилмайди. Кузатувларга кўра, вулқонларнинг ерости фаоллиги ва музликларнинг тўқнашуви яқин ўтмишда музларнинг бир қисми эриши учун қулай шароит яратган бўлиши мумкин.
Сўнгги йилларда олимлар Марс юзасида узоқ ўтмишда дарёлар, кўллар ва океанлар мавжуд бўлганига ишора қилувчи белгиларни топган. Бошқа томондан, сайёрашуносларнинг бир қисми Марсда қадимда доимий океанлар мавжуд бўлиши учун жуда совуқлик қилган ва сув фақат вулқонлар отилишидан кейингина суюқ ҳолда бўлган, деб ҳисоблайди.
Марсда кучли цунамилар изларининг топилиши, шунингдек, унинг геологияси билан боғлиқ бошқа маълумотлар олимларни суюқ сув Марсда ҳар доим ҳам эмас, балки унга метеоритлар ҳужум қилганда ёки вулқонлар уйғонганда мавжуд бўлган, деб ўйлашга мажбур қилади. Эриган сувларнинг оқимлари Марснинг юзасида улкан каналлар қазиган ва юз минг ва миллионлаб йиллар давомида музламаган вақтинчалик океан ва кўлларни ҳосил қилган бўлиши мумкин.
Изоҳ (0)