The Washington Post: АҚШ ўз ҳарбийларини Суриядан олиб чиқиш ниятида эмас

Дональд Трамп маъмурияти АҚШнинг Сурияга нисбатан вазифаларини кенгайтирди ва эндиликда улар нафақат ИШИД жангарилари яксон этилгунигача, балки ушбу мамлакатда сиёсий вазият яхшилангунига қадар қолади. Бу ҳақда The Washington Post’га таяниб, «Ведомости» хабар берди.

Газетанинг таъкидлашича, Башар Асад қўшини эронлик ва россиялик иттифоқдошлари билан ИШИД жангариларини батамом йўқ қилмоқда, ИШИДнинг яксон этилиши АҚШда Сурияда қолиш учун бошқа баҳода қолмаслигини билдиради.

АҚШ Суриянинг шимолида жойлашган ҳарбий контингентидан курдларнинг «Сурия демократик кучлари»ни (СДК) қўллаб-қувватлашда фойдаланишни режалаштирмоқда. Гап Америка ҳарбийлари СДК ҳарбийларига машғулот ўтган ва уларга жангариларга қарши курашишда ёрдам берган зона ҳақида кетмоқда. АҚШ ушбу ҳудудларда Дамашққа бўйсунмайдиган, ўзини-ўзи бошқарувчи маҳаллий ҳукумат яратишни кўзлаган. Шу орқали улар Асадга таъсир кўрсатиб, ноябрь охирида Женевада бўлиб ўтадиган музокараларда унинг чекинишига эришиш ниятида.

Америкалик амалдорларнинг сўзларига кўра, ўзларининг Суриядаги ҳарбий мавқеини сақлаб қолиш жуда муҳим, чунки ИШИДга қарши уруш ҳали тугамаган. Ўтган ҳафта охирида Пентагон раҳбари Жеймс Мэттис АҚШ Асад ва мухолифат ўртасидаги сиёсий келишувга эришилмагунича Суриядан чиқмаслигини маълум қилганди.

АҚШ қуролли кучларининг Суриядан тезда чиқиб кетиши Асадга бутун мамлакатни назорат олиш имконини беради.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.