Тошкентга Бутунжаҳон Каратэ Федерацияси (World Karate Federation — WKF) президенти Антонио Эспиноз ташриф буюрди. Бунга қадар Эспиноз Марказий Осиёда бўлмаганди, деб ёзди МОҚ матбуот хизмати.
Жаноб президентни пойтахтда МОҚ бош котиби Ойбек Қосимов ҳамда ташкилот вице-президенти Фарҳод Турдиев кутиб олди. Эспинозга сафари давомида WKF вице-президенти генерал майор Носир Абдулраззоқ Ар-Раззоқий, WKF Ижроқўми аъзоси ва бир вақтнинг ўзида Саудия Арабистони каратеси раҳбари Иброҳим Муҳаммад Ал-Ганнас ҳамроҳлик қилган.
Меҳмонлар МОҚ биносида жойлашган республика спорт тиббиёти илмий-амалий маркази билан таништирилгач, WKF президенти Тошкентда Осиё каратэ марказини очиш таклифини берди. Унинг айтишича, Марказий Осиё давлатлари орасида Ўзбекистон каратэ энг ривожланган мамлакат ҳисобланади. Қолаверса, Ўзбекистон Каратэ Миллий Федерацияси президенти Аламжон Муллаев амалга ошираётган ишлар ҳам жаҳон эътиборида турибди.
МОҚ бош котиби Ойбек Қосимовнинг айтишича, Ўзбекистонда айни вақтда 50 мингдан зиёд ёшлар каратэ билан мунтазам шуғулланиб келмоқда. Сондаги бу кўрсаткич сифатга ҳам таъсир ўтказиб, ўзбекистонлик спортчиларнинг халқаро майдондаги обрўси ўсиб бораётганига урғу берилди.
Каратэ спорт тури бунга қадар Олимпиада ўйинлари таснифига киритилмаганди. У Токио—2020 Олимпиадасидан бошлаб катта саҳнага чиқади. Сабаби, каратенинг ватани айнан Япония ҳисобланади.
WKF’нинг Токио—2020 Олимпиадасига йўлланма берувчи лицензион турнирлари 2018 йилнинг апрель ва май ойларидан старт олади ҳамда 2 йил давомида энг яхшилар сараланади.
Бутунжаҳон Каратэ Федерациясига 192 мамлакат аъзо ҳисобланади. Ташкилот штаб-квартираси Испания пойтахти Мадрид шаҳрида жойлашган.
Изоҳ (0)