Ўзбекистон Олий Лигасининг 29-туридан жой олган марказий ўйинда «Насаф» Тошкентнинг «Пахтакор» клубини йирик ҳисобда таслим қилди — 4:0. Шу тариқа Рўзиқул Бердиев шогирдлари мавсумни вице-чемпион сифатида якунлайдиган бўлди. Чемпионлик эса қаторасига иккинчи бор «Локомотив»га насиб қилди.
Самарқандда 5 та гол урган «Локомотив» клуби қаторасига иккинчи бор Ўзбекистон чемпионлигини қўлга киритди
Томонларнинг Тошкентда кечган 1-давра ўйинида «пахтакорчилар» 2:1 ҳисобида зафар қучганди. Агар Қаршида ҳам бу ҳолат такрорланса, «Пахтакор» ўзаро ўйинлардаги устунликка эришиб, 2-ўринни нақд қилиши мумкин эди. Боиси, «Насаф»га қарши беллашув «Пахтакор» учун мавсумдаги сўнггиси бўлди. Шота Арвеладзе шогирдлари «Обод» лигадан четлаштирилгани учун, 30-турда дам олади.Қаршидаги беллашув Осиё Чемпионлар Лигасига йўлланма бериши билан аҳамиятли эди. ОФК Ўзбекистон учун 1+2 квотасини ажратган бўлиб, гуруҳ босқичига йўлланма берувчи ягона чиптани мамлакат чемпиони сифатида «Локомотив» ютиб олди. «Насаф» эса саралашда ўйнаш имкониятини тақдим этувчи икки чиптадан бирига эга чиқди.
Бу «Насаф»нинг кетма-кет 11-ғалабаси бўлди. Бердиев жамоаси сўнгги бор 18 август куни Миржалол Қосимов бошқарувидаги «Бунёдкор»дан ўз майдонида енгилганди — 0:1. Шундан кейин «Насаф» 11 та учрашувда зафар қучди ва уларнинг 10 тасида дарвозасидан гол ўтказмади.
2017 йил ҳисобидан «Насаф» ва «Пахтакор» клублари ўзаро тўрт бор тўқнаш келди ва шуларнинг 3 тасида Рўзиқул Бердиев жамоаси зафар қучди. Чемпионатдан ташқари Ўзбекистон Кубогининг чорак финалида Қарши клуби Тошкент грандини икки бор мағлуб этганди — 3:0 ва 1:0.
1-даврадан кейин Шота Арвеладзе бошқарувидаги «Пахтакор» «Насаф»нинг икки етакчи футболчиси — дарвозабон Элдор Суюнов ҳамда ҳимоячи Шерзод Аъзамовни харид қилганди. Рўзиқул Бердиев уларга ўринбосар топа олди. Масалан, дарвозабон Санжар Қувватовнинг статистикаси аввалги посбон Элдор Суюновникидан яхшироқ бўлди. «Пахтакор» эса 2-даврада ҳам Александр Лобанов билан ўйнашда давом этди ва мавсумни йирик мағлубият билан тугатди.
Ўзбекистон Олий Лигаси 29-тур беллашувлари 19 ноябрь, якшанба
«Насаф» — «Пахтакор» 4:0
Голлар: Бобур Абдухолиқов, 43 (1:0). Драган Черан, 60-пен (2:0). Баҳром Абдураҳимов, 77 (3:0). Драган Черан, 90 (4:0).Халқаро майдонга йўлланма берувчи учинчи чипта эгаси 4 декабрь куни бўлиб ўтадиган Ўзбекистон Кубогининг финалидан кейин маълум бўлади. Унда «Локомотив» ва «Бунёдкор» ўзаро саф тортади. Миржалол Қосимов бошқарувидаги «Бунёдкор» кубокни қўлга кирица, ОЧЛ йўлланмасини илиб кетади.
Беллашувда «Локо» зафар қучса, чипта «Пахтакор»га насиб қилади. Зеро, кубок финалида ўйнаган жамоага ҳеч нарса ваъда қилинмаган. «Локомотив»нинг ўзида 1 та аниқ йўлланма борлиги учун, бундай ҳолатда автоматик равишда чемпионатни 3-ўринда якунлаган «Пахтакор»га сўнгги чипта берилади.
Изоҳ (0)