Хонанда Баҳром Назаров 14—16 ноябрь кунлари «Истиқлол» санъат саройида «Интизор» деб номланган концерт дастурини тақдим этди. Дастурда меҳмон бўлган журналист Феруз Муҳаммад ўз фикр-мулоҳазалари билан ўртоқлашди.
Концертни белгиланган вақтидан 10—15 дақиқа кеч бошлаш сўнгги йилларда барча хонандалар ичида анъанага айланган. Бу анъанага хонанда Баҳром Назаров ҳам «содиқ қолиб», ўз концертини 12 дақиқа кеч бошлади.
Биринчи бўлим
Дастур журналист Хайрулла Ҳамидовнинг Ватан ҳақидаги монологи ва шеъри билан бошланиб, хонанданинг «Ўзбекистон — Ватаним маним» номли янги таронаси билан давом этди.
Шунингдек, биринчи бўлимда, «Айрилдим», «Хато қилдим», «Кулиб деди», «Қанисан», «Акси қолди», «Қиза боқ», «Гапим бор» деб номланган тароналар куйланди. Феруз қаламига мансуб «Кулиб деди», Рауф Парфи қаламига мансуб шеър асосида «Хато қилдим» деб номланган тароналар алоҳида эътирофга муносибдир.
«Айрилдим»нинг укаси куйланди
«Кўплаб мухлисларимиз ‘Айрилдим’га ўхшаган яна бир қўшиқ қилинг, дея таклиф беришар эди. «Акси қолди» номли янги таронамизни ‘Айрилдим’нинг укаси деса ҳам бўлади».
Баҳром Назаров шундай дея, мунгли бир қўшиқни илк бор мухлисларига куйлаб берди. Қўшиқ ҳам, у куйланаётганда саҳнадаги катта мониторда кўрсатилган фотолавҳалар ҳам ажойиб чиқди. Қўшиқ давомли қарсаклар билан кутиб олинди.
«Илк маротаба саҳнага чиққанимда шолғомга айланиб қолган эдим»
Биринчи бўлим сўнггида хонанда Баҳром Назаров ҳали шогирд мақомида эканлигини алоҳида таъкидлаб ўтди. «Ўзим шогирд бўлсам-да, бизга ҳам ака, устоз деб юрган укаларимиз, таъбир жоиз бўлса, шогирдларимиз бор. Шундай шогирдларимиздан бири — Озодбек Назарбековга набира шогирд бўлади», — дея шогирди Шаҳзод Назаровни саҳнага таклиф қилди.
Шогирдига: «Ҳаяжон кучлими», дея савол берган хонанда, «Мен ҳам илк марта устозимнинг концертида, саҳнага чиққанимда, шолғомга айланиб қолишимга сал қолган», дея ҳазиллашиб қўйди. Баҳром Назаровнинг шогирди «Мен сенсиз» номли қўшиқни куйлади.
Иккинчи бўлим
Иккинчи бўлим «Аёл» деб номланган сокин тарона билан бошланди. Хонанда ушбу қўшиқни айтиш мобайнида бир даста гулни мухлисларга совға ҳам қилди. Баҳром Назаров «Лола, лола» деб номланган қўшиғини тожик тилида куйлади. Тожикча «Лола, лола»га жажжи раққоса қизлар ажойиб рақс тайёрлашгани мухлисларга кўтаринки кайфият улашди.
Дастурда бирорта шунчакига, концерт учун, рэпертуарни тўлдириш учун, қўл учида тайёрланган қўшиқни тингламадик. Масалан, хонанданинг «Сен онамга ўхшайсан, ҳилол» деб номланган мунгли, аччиқ хотира ҳикоя қилинган таронаси ва қўшиққа мос суратлар жамланмаси йиғилган мухлисларнинг кўзини ёшлатди.
Назаров «Булбулдан бўлсин, булбулдан!», дея талаб қилаётган мухлислари учун куйланиши режалаштирилмаган «Кечикиш» номли қўшиқни жонли куйлаб берди. Бизнингча, дастурда жонли куйланиши лозим бўлган қўшиқлар кўп эди, аммо Баҳром Назаров ҳар йили концертида фақат битта қўшиқни жонли куйлаш билан чекланиб қолмоқда. Озгина вақт, маблағ ва меҳнат билан ҳар йили, ҳеч бўлмаса, 5—6 қўшиқни жонли куйлаш мумкин.
Ривоят ўзгариб кетишига сал қолди...
Баҳром Назаров устози, Ўзбекистон халқ артисти Озодбек Назарбековнинг «Нега учрашдик» номли қўшиғини куйлаш арафасида устозлар ҳақида ривоят айтаркан, юнон саркардаси Искандарнинг устози ва отасининг исмини адаштириб юборишига бир баҳя қолди. Бироқ, кучли ҳаяжонини босиб олган хонанда, кейинроқ сўзини тўғрилаб давом эттирди.
Иккинчи бўлимга хонанданинг «Наҳотки» таронаси якун ясади. Ушбу таронага раққоса Паризода яккахонлигида, таъбир жоиз бўлса, такрорланмас рақс ижро қилинди.
Ҳа-я, айтмоқчи, концерт дастурида қизиқчи Шукрулло Исроилов меҳмон бўлиб, йиғилганларга хуш кайфият улашди.
Учинчи бўлим
Учинчи бўлим концертга номи берилган, Огаҳий ғазали асосида тайёрланган оҳанраболи «Интизор» таронаси билан бошланди. Хонанданинг «Ёмон экан-да» деб номланган таронаси ҳам давомли қарсакларга сабаб бўлди. Бу бўлимда «Йўқ-йўқ», «Жимбир» деб номланган янги тароналар билан бир қаторда туркча «Ринна-ринна» деб номланган қўшиқ ҳам куйланди.
«Пари-пари» деб номланган қўшиқни куйлаб залга тушган хонанда барча мухлисларни рақсга чорлади. «Дил-у жонимдасан» таронасини дастурнинг сўнгги таронаси бўлди. Шу қўшиқдан сўнг Баҳром Назаров: «Концертимиз ёққан бўлса бир кишига, ёқмаган бўлса минг кишига айтинг», деган сўз билан концертга якун ясади.
Изоҳ (0)