Хонанда Шуҳрат Дарё 25—26 октябрь кунлари «Истиқлол» санъат саройида жонли ижрода бўлиб ўтадиган «Шаббода» деб номланган концерт дастурини тақдим этади. Журналист Феруз Муҳаммад концертолди тайёргарлик жараёнидан фоторепортаж тайёрлади.
Хонанда бундан аввал жонли ижро ихлосмандлари учун «Туркистон» санъат саройида «Бахт кулиб» деб номланган концерт дастурини ҳам тақдим қилган эди. «Шаббода» хонанданинг «Истиқлол» санъат саройидаги илк жонли ижродаги дастури ҳисобланади.
Икки ойдан ортиқ вақт мобайнида тайёргарлик кўрилаётган дастурнинг сўнгги ишларида хонанданинг ҳам, созандаларнинг ҳам кайфияти аъло даражада бўлиб, ҳар ким ўз ишига масъулият ва кўтаринки кайфият билан ёндашмоқда.
Хонанда мазкур дастурида томошабинни куй ва қўшиқ сеҳридан узоқлаштираётган ҳар қандай жимжимадорликдан воз кечишга қарор қилган.
Шуҳрат Дарёнинг «Туркистон» санъат саройидаги концерт дастурига кўп миллатли мухлислар меҳмон бўлишгани сабабли, бу галги концертда чет тилларида куйланган қўшиқлар ҳам жаранг сочади.
Дастур уч бўлимдан иборат бўлиб, бўлимлар ҳеч қандай қўшимча воситалар билан ажратилмайди. Дастурда қизиқчилар, сўз усталари, раққосалар ҳам бўлмайди.
Дастурнинг яна бир мезбони, моҳир созанда — Маъмуржон Зилолов концерт кулминациясида чиқиш қилиши кутилмоқда. Ҳозирча созанда қайси созлар иштирокида чиқиш қилиши сир тутилмоқда.
Дастурда Ўзбекистон халқ шоирлари Абдулла Орипов, Эркин Воҳидов, Муҳаммад Юсуф каби шоирларнинг бир-биридан дилбар шеърларига мурожаат қилинган тароналар куйланади.
Изоҳ (0)