Ўзбекистон ҳукуматининг 23 октябрдаги қарори билан, мамлакатдаги учта тиббиёт муассасасида буйрак ва (ёки) жигар бўлагини трансплантация қилиш бўйича жарроҳлик амалиётлари амалга оширила бошланди.
Ҳозирда эса ҳукумат қарори ижроси доирасида даволаш муассасаларини тегишли тартибда жиҳозлаш, кадрлар тайёрлаш борасида жадал иш олиб борилмоқда. Шунингдек, соҳанинг жаҳондаги нуфузли мутахассислари билан яқин ҳамкорлик алоқалари йўлга қўйилган.
Халқимиз ва тиббиёт ходимлари узоқ йиллардан буён кутган янгилик бўлди. Мамлакатимизда аъзолар трансплантацияси каби ўта ноёб ва мураккаб жарроҳлик амалиёти йўлга қўйилди. Бундай юқори технологик операциялар АҚШ, Германия, Норвегия, Швейцария ва Ҳиндистон каби тиббиёти ривожланган давлатлардагина бажарилади, холос. Бугун Ўзбекистон тиббиёти ана шу давлатлар қаторидан жой олди.Соғлиқни сақлаш вазирлиги матбуот хизматининг қайд этишича, ҳозирча ушбу ноёб тиббий хизматни жорий этиш бўйича асосий қадамлар ташланди. «Келажакда унинг кўлами, имкониятлари янада кенгаяди. Бунинг учун Ўзбекистонда илмий, техник ва ҳуқуқий жиҳатдан барча шароитлар яратилган», — дейилади вазирлик ахборотида.Илгари беморлар чет давлатларга бориб, катта маблағ сарфлаб, ана шу жарроҳлик амалиётини ўтказишга мажбур бўлаётган эди. Лекин шунга эҳтиёжи бор беморларнинг барчаси ҳам бундай имкониятга эга эмас. Масаланинг яна бир томони — хорижда аъзо кўчириш операциясини ўтказиб келган беморларда оғир асоратли ҳолатлар ҳам кузатилиб турган эди. Чунки бундай беморлар доимий равишда шифокор назоратида бўлиши лозим, тиббий кўриклардан ўтиб туриши, турмуш тарзида ўзига хосликларга амал қилиши талаб этилади.
Мана шундай муаммоларнинг олдини олиш мақсадида юртимизда трансплантология хизмати йўлга қўйилди.
Улуғбек Йўлдошев, Соғлиқни сақлаш вазирлиги бош трансплантологи
Изоҳ (0)