Перу шимолидаги Ламбаеке тарихий ҳудудида жойлашган 4500 йиллик Вентаррон археологик ёдгорлиги ёнғин натижасида зарар кўрди: аланга иншоотлар ва артефактларнинг 95 фоизини йўқ қилди, деб ёзади National Geographic.
2007 йилда очилган мажмуанинг деворларини безаб турган 4000 йиллик фрескалар бутун Америкадаги энг қадимийлари деб топилган эди. Ёнғин оқибатида қадимий релефлар, кулолчилик буюмлари ва бошқа топилмаларга ҳам зиён етди.
Олимлар етган зарарни тузатиб бўлмайдиган деб атамоқда ва айбдорларни жавобгарликка тортишни талаб қилмоқда.
Pomalco қишлоқ хўжалик компанияси вакиллари далаларни кейинги экин мавсумига тайёрлаш учун қамишзорларни ёққан эди, аммо аланга назоратдан чиқиб кетиб, ён-атрофга ҳам тарқалиб кетди.
Бунинг устига археологик мажмуа ноқулай об-ҳаводан ҳимоя сифатида арзон ҳамда тез аланга оладиган материаллар билан тўсиб қўйилган эди.
Изоҳ (0)