Трамп Обамани бўралаб сўккан Филиппин президенти Дутерте билан илиқ муносабатлар ўрнатганини маълум қилди

АҚШ етакчиси Дональд Трамп Филиппин президенти Родриго Дутерте билан илиқ муносабатлар ўрнатганини маълум қилди. Бу ҳақда у Манилада, Жануби-Шарқий Осиё давлатлари ассоциацияси (ACEАН) саммити доирасида Дутерте билан учрашуви арафасида айтиб ўтди, дея хабар беради «ТАСС». 

«Иккимиз ўртамизда кўнгилдагидек алоқалар ўрнатилди. Бу тадбир муваффақиятли бўлди. Филиппин президенти ACEАН конференциясини жуда яхши ташкиллади», — деди Трамп. 

Ўз навбатида, Дутерте АҚШ президентига мурожаат этар экан, «сизларнинг ўта муҳим иттифоқдошингизмиз», дея эслатиб ўтди. 

Трамп ва Дутертенинг суҳбатидан сўнг Оқ уй матбуот котиби Сара Сандерс мулоқот чоғида асосий эътибор ИШИД муаммоси ва савдога қаратилганини таъкидлади. 

Филиппин президенти Родриго Дутерте олдинлари Оқ уйнинг собиқ раҳбари Барак Обама шаънига нисбатан бир неча бор кескин фикр билдирганди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.