Супермаркетларнинг талабларига кўра, пештахталардаги мева ва сабзавотлар чиройли кўринишга эга бўлиши керак, акс ҳолда харидорлар уни сотиб олмайди. Бу фермерларнинг ташқи кўриниши чиройли бўлмаган маҳсулотлари пештахталардан ўрин олмаслигини билдиради. АҚШ Қишлоқ хўжалиги департаментининг маълумотларига кўра, шикаст етган мева ва сабзавотларнинг 30 фоиздан 40 фоизигача бўлган қисми шунчаки ташлаб юборилади, деб хабар берди Forum Daily.
Кўриниши чиройли бўлмаган маҳсулотларнинг мазаси пештахтадагилардан фарқ қилмайди. Imperfect компанияси эса бундан фойдаланишга қарор қилди.
Компания асосчиси Бен Чеслер фермерлардан ташқи кўриниши номукаммал бўлган мева ва сабзавотларни сотиб олиб, уларни дўкондагилардан 30—50 фоиз арзонга сотмоқда.
Компания Сан-Франциско, Лос-Анжелес (Калифорния), Портленд (Орегон), Сиэтл (Вашингтон) ва Чикаго (Иллинойс) шаҳрида фаолият кўрсатмоқда. Харидорлар ўзларига керакли бўлган маҳсулотларни онлайн буюртма қилади, компания эса буюртмани мижозларнинг уйига етказиб беради.
Маҳсулот нархи унинг ўлчами ва буюртма турига боғлиқ. 3—4 килограммли органик мева ва сабзавотларнинг нархи 15—17 доллар. 11 килограмм атрофидаги катта пакет эса 39—43 доллар туради. Етказиб бериш 4,99 доллар.
Харидорлар компаниянинг www.imperfectproduce.com сайти орқали буюртма қилишлари мумкин. Фақат буюртмани олдиндан амалга ошириш керак, чунки уни етказиб бериш учун кетадиган вақт мижознинг қаерда истиқомат қилишидан келиб чиқади.
Imperfect 2 йилдан буён мавжуд ва бу вақт давомида у ташқи кўриниши хунуклиги сабаб йўқ қилиниши керак бўлган 3 миллион килограмм маҳсулотни сотишга эришди.
Изоҳ (0)