12 ноябрь, якшанба куни тунда Эроннинг Ироқ билан чегараси яқинида юз берган зилзила оқибатида 300 дан ортиқ киши ҳалок бўлди.
Қурбонлар ва вайронагарчиликларнинг асосий қисми Эроннинг Кирмоншоҳ ҳамда Илом вилоятларига тўғри келмоқда.
Mehr News маълумотларига кўра, Кирмоншоҳ вилоятида тонгга яқин электр энергияси узатиш ва телефон алоқасини қисман тиклашга муваффақ бўлинди.
Бир қатор туманларда сув етказиб беришда узилишлар юз бермоқда.
Фуқаро мудофааси кучлари вакили сўзларига кўра, вилоятда 7 минг кишига мўлжалланган дала госпиталлари ташкил этилди.
Маҳаллий расмийлар адёл, озиқ-овқат маҳсулотлари ва донорлик қонига эҳтиёж борлигини таъкидламоқда.
Энг кўп қурбонлар ва вайронагарчиликлар қайд қилинган Сарпол-э-Захаб шаҳридаги шифохона жабрланувчиларни қабул қила олмаяпти, шу сабабли уларни армия вертолётларида бошқа шаҳарлардаги касалхоналарга жўнатишмоқда.
Одамлар ўтган тунни кўчада гулхан ёқиб ўтказди. Тунда термометр кўрсаткичи деярли 0 даражагача тушиб кетди, тонгда ҳарорат 12 даражагача кўтарилди.
Европа — Ўртаер денгизи сейсмология маркази маълумотларига кўра, 7,2 ва 7,3 магнитудали иккида ерости силкиниши қайд этилди. Зилзила эпицентри Сарпол-э-Захабдан 32 км шимолда, унинг ўчоғи 10 км чуқурликда жойлашди.
Тунда 4,9 магнитудагача бўлган такрорий силкинишлар қайд этилди, уларнинг умумий сони 20 тага етди.
Мавзуга доир: Шавкат Мирзиёев Эрон президентига ҳамдардлик билдирди
Изоҳ (0)