12-noyabr, yakshanba kuni tunda Eronning Iroq bilan chegarasi yaqinida yuz bergan zilzila oqibatida 300 dan ortiq kishi halok bo‘ldi.
Qurbonlar va vayronagarchiliklarning asosiy qismi Eronning Kirmonshoh hamda Ilom viloyatlariga to‘g‘ri kelmoqda.
Mehr News ma’lumotlariga ko‘ra, Kirmonshoh viloyatida tongga yaqin elektr energiyasi uzatish va telefon aloqasini qisman tiklashga muvaffaq bo‘lindi.
Bir qator tumanlarda suv yetkazib berishda uzilishlar yuz bermoqda.
Fuqaro mudofaasi kuchlari vakilining so‘zlariga ko‘ra, viloyatda 7 ming kishiga mo‘ljallangan dala gospitallari tashkil etildi.
Mahalliy rasmiylar adyol, oziq-ovqat mahsulotlari va donorlik qoniga ehtiyoj borligini ta’kidlamoqda.
Eng ko‘p qurbonlar va vayronagarchiliklar qayd qilingan Sarpol-e-Zaxab shahridagi shifoxona jabrlanuvchilarni qabul qila olmayapti, shu sababli ularni armiya vertolyotlarida boshqa shaharlarga, jumladan Tehronga jo‘natishmoqda.
Odamlar o‘tgan tunni ko‘chada gulxan yoqib o‘tkazdi. Tunda termometr ko‘rsatkichi deyarli 0 darajagacha tushib ketdi, tongda harorat 12 darajagacha ko‘tarildi.
Yevropa — O‘rtayer dengizi seysmologiya markazi ma’lumotlariga ko‘ra, 7,2 va 7,3 magnitudali ikkita yerosti silkinishi qayd etildi. Zilzila epitsentri Sarpol-e-Zaxabdan 32 km shimolda, uning o‘chog‘i 10 km chuqurlikda joylashdi.
Tunda 4,9 magnitudagacha bo‘lgan takroriy silkinishlar qayd etildi, ularning umumiy soni 20 taga yetdi.
Mavzuga doir: Shavkat Mirziyoyev Eron prezidentiga hamdardlik bildirdi
Izoh (0)