Ўзбекистон Жаҳон соғлиқни сақлаш ташкилоти (ЖССТ) томонидан қизамиқ ва қизилча касалликларини бартараф этган мамлакат сифатида тан олинди. Бу ҳақда Тошкентдаги UNICEF ваколатхонаси хабар берди. Мамлакат 2014 йилнинг январь ойидан 2016 йилнинг декабригача бўлган давр ичида ушбу касалликларни бартараф этишга эришди.
ЖССТнинг қизамиқ ва қизилча бартараф этилганини тасдиқловчи Европа минтақавий комиссиясининг таъкидлашича, бу ҳолат бутун Эвропа минтақасида қизамиқ ва қизилча касаллигини бартараф этиш мақсадига эришишга сезиларли даражада ҳисса қўшади.
2007 йилда Ўзбекистон Миллий эмлаш тақвимига қизамиқ, тепки ва қизилча (ҚТҚ)га қарши вакцина киритилди. 12 ойлигида ва 6 ёшида болани ҚТҚга қарши эмлаш ушбу касалликларга нисбатан умрбод иммунитетни шакллантиради.
Мамлакат бўйича ҚТҚга қарши эмлаш кўрсаткичлари юқори бўлиб, бунда қамров биринчи эмлашда 99,5% ни ва қайта эмлашда 99,7% ни ташкил этади (2016).
Юқумли касалликлар болалар саломатлигига таҳдид соладиган асосий хавфлардан бири ҳисобланади. Шу боис Соғлиқни сақлаш вазирлиги олдини олиш мумкин бўлган касалликларга қарши эмлаш, уларнинг олдини олиш ва тугатишга қаратилган Миллий эмлаш дастурини амалга ошириш бўйича қатор чоралар кўрмоқда, дейилади хабарда.
«14 ёшгача бўлган болалар Ўзбекистон аҳолисининг 27 фоизини ташкил қилади. Эмлаш биз томондан келажак авлодлар учун соғлиқни сақлаш соҳасида қила оладиган энг муваффақиятли ва молиявий томондан самарали сармоялардан биридир,— деб таъкидлади UNICEF’нинг Ўзбекистондаги ваколатхонаси раҳбари Саша Грауманн. — Миллий эмлаш тақвими бўйича умумий қамровни таъминлаш учун Ҳукумат, халқаро ҳамкорлар ва маҳаллий жамоалар билан биргаликда ишлашни давом эттирамиз».
UNICEF Ўзбекистон ҳукуматига янги вакциналарни киритиш ва сотиб олиш, уларнинг сифатли сақланиши учун совуқ занжир тизимини янада яхшилаш, вакциналарни харид қилишда мустақил молиялаштиришга эришиш ва эмлашга бўлган талабни доимий равишда оширишда кўмак бериб келмоқда.
Сўнгги ўн йилликда Ўзбекистон вакциналарни сотиб олишни барқарор ва мустақил равишда молиялаштиришга ўтди. 2010 йилда республикага олиб келинган вакциналарнинг 90 фоизи давлат бюджети ҳисобидан сотиб олинди. 2020 йилга келиб, мамлакат барча вакциналарни фақат ўз ҳисобидан сотиб олишни режалаштирмоқда.
Изоҳ (0)