Тошкентда ошхона анжомларини шаҳардаги бозор ва дўконлардан сотиб олиб, сўнг уларни алдов йўли билан аҳолига қиммат нархда сотиш билан шуғулланган молдовалик циганлар қўлга олинди. Бу ҳақда Тошкент шаҳар ИИББ матбуот хизмати хабар бермоқда.
Тошкент шаҳрида 5 ноябрь куни милиция ходимлари томонидан циган миллатига мансуб икки нафар Молдова фуқароси — 1991 йилда туғилган Александр Плешко ва 1987 йилда туғилган Александр Чеботарь қўлга олинган.
6 ноябрь куни эса циган миллатига мансуб тўрт молдовалик қўлга олинган. ИИББ ахборотига кўра, булар — 1991 йилда туғилган Матфей Ненита, 1995 йилда туғилган Еримей Кира, 1992 йилда туғилган Никита Радукан ва 1973 йилда туғилган Михаил Ненита.
Улар кўп қаватли уйлар атрофида, бозор ва супермаркетларда харидорларга: «Европада ишлаб чиқарилган», деб алдаб, аслида «Абу Сахий» бозоридан арзонга олинган ошхона анжомлари, идиш-товоқ комплектлари ва бошқа шу каби буюмларни қимматга сотиш билан шуғулланган.
Қайд этишларича, Плешко ва Чеботарь шу вақтгача Тошкент вилоятидаги меҳмонхонада, Кира, Радукан ва Нениталар Тошкент шаҳридаги меҳмонхонада вақтинча яшаб келган.
Уларнинг айнан қаерда яшагани, қачон Ўзбекистонга келгани ва энди уларга қандай чора кўрилиши ҳақида қўшимча ахборот берилмаган.
Изоҳ (0)