Сурхондарё вилояти ҳокими Эркинжон Турдимов раҳбарлигида вилоятнинг Шўрчи туманида сайёр қабул ташкил этилди. Бу ҳақда вилоят ҳокимининг Facebook’даги саҳифасида хабар қолдирилган.
Сайёр қабул давомида аҳолидан 331 та мурожаат келиб тушган, уларнинг аксарияти жойида ўз ечимини топган. Қайд этишларича, сайёр қабул жараёнида аҳолидан тушган мурожаатларнинг кўпчилиги маҳалла, туман миқёсида ҳал этилиши керак бўлган масалалардир.
«Фуқаролардан асосан уй-жойга бўлган эҳтиёж, ишга жойлашиш, тадбиркорлик қилиш учун ер ажратиш, кредит маблағи олиш, электр энергияси, газ, ичимлик суви билан таъминлаш каби масалаларда мурожаатлар келиб тушди», — дейилади хабарда.
Бу борада «Маҳалла» фондининг туман бўлими ва маҳалла фуқаролар йиғинлари, «Нуроний» жамғармаси туман бўлими каби бир қатор ташкилотларнинг фаолияти қониқарсиз экани, мазкур ташкилотлар томонидан ишлар тизимли ташкил этилмагани, фуқароларнинг мурожаатларига бееътибор бўлаётганлиги алоҳида таъкидланди.
Изоҳ (0)