Қўшма Штатлар Конго демократик республикаси расмийларидан 2018 йилда президентлик сайловлари ўтказилишига эришади ва бу жараён яна кечиктирилишига йўл қўймайди. Бу ҳақда АҚШнинг БМТдаги доимий вакили Никки Хейли маълум қилди, дея хабар беради «ТАСС».
«Ҳокимиятни ушлаб қолишга уринишлар Конго етакчилари ва ҳукумати яккаланиб қолишига олиб келади, холос. Биз мамлакат сайлов комиссияси эълон қилган жадвалга президент Кабила ва унинг ҳукумати қатъий амал қилиши кафолатланиши устида Конго, БМТ ва шерикларимиз билан тиғиз ишлаймиз. Одамларга мамлакат келажаги бўйича танлов имкониятини бериш учун ҳеч қандай янги кечиктиришларга йўл қўймаймиз», — таъкидлади Хейли.
Жозеф Кабиланинг ваколатлари 2016 йил декабрида якунига етганди, бироқ расмийлар мамлакат президентлик сайловларига тайёр эмаслигини рўкач қилиб, уларни бир йилга кечиктирди. Кейинчалик сайлов комиссияси овоз беришга тайёргарликни яна бир йилга узайтиришни таклиф қилди. Жорий йил 11 октябрида эса сайловлар 2019 йил апрелида ўтказилишини билдирди.
Мухолифатнинг кескин норозилигидан сўнг 5 ноябрь, якшанба куни овоз беришнинг узил-кесил муддати сифатида 2018 йил декабри эълон қилинди.
Изоҳ (0)