Дания иммиграция ишлари вазири Ингер Стойберг 3 ноябрь куни қочоқларни сақлаш марказига ташриф буюрди. Вазир марказни тарк этаётган вақтда, унинг машинаси капот олдига туриб олган муҳожир аёллардан бирини босиб кетди. Бу ҳақда «РБК» хабар бермоқда.
Вазир Стойберг ташриф буюрган марказда Дания ҳукумати қочоқ мақомини беришдан бош тортган муҳожирлар истиқомат қилади. Даниялик амалдор марказдаги яшаш шароитлари, хусусан, унда болалар қандай сақланаётгани билан танишиш мақсадида бу ерга келган эди.
Стойберг муҳожир оилалардан бирининг меҳмони бўлган. Шу вақт марказнинг бошқа аҳолиси Дания ҳукуматидан норозилигини билдира бошлаган. Сўнг вазир қўриқчилар қуршовида дарҳол машинаси томон йўл олган.
Муҳожир аёллардан бири вазирнинг машинаси йўлини тўсиш мақсадида, унинг олдига туриб олган. Қўриқчилар йўлдан олишга уринган, бироқ авариянинг олдини олишга улгурмаган. Оқибатда машина аёлни уриб кетган ва бир неча ўн метр юриб, тўхтаган.
DR нашрининг гувоҳлар сўзларига асосланиб хабар беришича, қайтиш вақтида вазирга норози муҳожирлар ҳамроҳлик қилган. Полиция маълумотларига кўра, машина остида қолган аёл жиддий тан жароҳати олмаган.
Изоҳ (0)