АҚШнинг Юта штатида яшовчи ҳамшира Алекс Вабблс маҳаллий полициячилар иштирокида рўй берган ҳолат учун товон пули сифатида 500 минг долларга эга бўлди. Бу ҳақда TJournal хабар бермоқда.
Шифохона ходимаси полициячиларни беморнинг қонидан намуна олишга қўймади. Шундан сўнг ҳуқуқ-тартибот органлари ходимлари ҳамширани ҳибсга олди.
Мазкур ҳолат 2017 йилнинг 26 июлида кузатилган эди. Эркак бемор палатада хушсиз ётган эди, уч нафар полициячи унинг қонидан таҳлил учун намуна олмоқчи бўлди. Ҳамшира эса қонун бўйича беморнинг қонини таҳлил қилиш учун унинг ёзма розилиги керак бўлишини айтиб, уларга рухсат бермади.
Бир неча марта рад этишлардан сўнг полициячилар ҳамширага қўполлик қилиб, унинг қўлини қайирди ва ҳибсга олди.
Ҳамширага нисбатан айблов эълон қилинмаган, бироқ у автомобилда 20 дақиқа ушлаб турилган. Ҳамширани ҳибсга олиш жараёни акс этган видео YouTube’га жойлаштирилган, шундан сўнг полиция ҳолат бўйича суриштирув ўтказган.
Аёлга қўполлик қилган полициячилардан бири ишдан бўшатилган, икки нафари эса ишдан четлатилган.
Вабблс эса товон пулидан ташқари ўз вазифасини сидқидилдан бажаргани учун мукофот пули ҳам олди. Автоҳалокатда куйиш жароҳатини олган бемор эркак эса сентябрь ойининг охирида вафот этди.
Изоҳ (0)