Қирғизистон президенти девонидаги манбалар маълум қилишича, янги сайланган президент Сооронбай Жээнбековнинг инаугурацияси 24 октябрь куни «Ала-Арча» давлат резиденсиясида бўлиб ўтади. Маросимнинг бўлиб ўтиш санаси ва жойини Жээнбеков штатидагилар тасдиқлади, деб хабар берди Knews.
Бунга қадар инаугурациялар Сатилганов номидаги Қирғизистон Миллий филармониясида ўтказилган. Фақатгина бир маротаба Жўқорғи Кенгес жойлашган Оқ уйда бўлиб ўтган.
Белгиланган қоидаларга кўра, сайланган президент давлат бошлиғининг ваколатларини адолатли амалга ошириш учун конституцияга қўл қўйган ҳолда қасамёд қилиши керак.
Инаугурация жараёнида Сооронбай Жээнбековга ўз вазифасига киришиши олдидан Марказий сайлов комиссияси томонидан президент сифатида сайлангани тўғрисида гувоҳнома, кўкрак нишони ва унинг исм-шарифи, шунингдек, ваколат муддати туширилган президентнинг штандарти тақдим этилади.
Изоҳ (0)