27 октябрь куни жиноий ишлар бўйича Миробод туман суди Боровский номидаги тиббиёт коллежи ўқувчиси Жасурбек Иброҳимовнинг ўлими юзасидан иш кўрилиши давом этди. Адвокатлар ва марҳумнинг онаси тингланди, деб хабар беради «Новости Узбекистана».
Нилуфар Алиева ўзининг судга якуний мурожаатида марҳумни яна бир бор ҳимоя қилиб, дастлабки тергов ва суд ишида камчиликлар бўлганини таъкидлаб ўтди.
Жумладан, аёл жиноий иш қўзғатиш муддати 28 кунга кечиктирилганини маълум қилди. Унинг сўзларига қараганда, тергов сифатсиз олиб борилган, гувоҳлар холисона сўроқ қилинмаган, суд-тиббиёт экспертизаси ўз вақтида ўтказилмаган, бирорта тергов эксперименти ўтказилмаган, суд-тиббиёт экспертизасининг хулосаси жиноят картинасига мос келмайди ва ҳоказо. Асосийси эса, унинг айтишича, Жасурбек ҳаётлигида сўроқ қилинмаган.
Нилуфар Алиеванинг фикрича, суд суриштируви ҳам шошқалоқлик билан ўтказилган, жабрланувчи томоннинг бирорта гувоҳи берган кўрсатмалар муносиб баҳоланмаган, айрим гувоҳларнинг кўрсатмалари бир-бирига зид келгани инобатга олинмаган. Бунинг бари ёлғон гувоҳлик бериш сифатида баҳоланиши лозим эди.
Шунингдек, Нилуфар Алиева давлат айбловчиси суд-тиббиёт экспертизаси хулосасини инобатга олмаганини таъкидлади. Экспертиза натижалари Жасурбек кўпчилик томонидан калтакланганини тасдиқлаган эди.
Жасурбекнинг онаси яна бир қизиқ жиҳатга эътибор қаратди — судга коллеж ўқитувчилари таклиф этилмади, уларга қўнғироқ қилиб тушиб бўлмагани бунга сабаб сифатида кўрсатилди.
Аёлнинг фикрича, иш гуруҳ бўлиб содир этилган ўта оғир жиноят сифатида таснифланиши лозим эди.
Нилуфар бу фактларни ўз кўрсатмаларид ҳамшира Малика Сиддиқова ҳам тасдиқлаганини тушунтириб ўтди. Шунингдек, аёл давлат айбловчисидан у Исломбек Тўлагановга нисбатан енгиллаштирувчи моддани қўллаб, олти йил колонияга ҳукм этишни сўрашига асос бўлган фактларни аниқлаштиришни сўради.
Шу куни икки томоннинг адвокатлари ҳам сўзга чиқди.
Изоҳ (0)