Ўзбекистон Президенти Шавкат Мирзиёев 27 октябрь куни Россия президенти Владимир Путиннинг топшириғига биноан Ўзбекистонга келган Россия бош вазири ўринбосари Дмитрий Рогозинни қабул қилди. Бу ҳақда ЎзА хабар берди.
Шавкат Мирзиёев меҳмонни қутлар экан, олий ва юксак даражадаги мунтазам ва самарали мулоқотлар Ўзбекистон билан Россия ўртасидаги стратегик шериклик ва иттифоқчилик муносабатлари мустаҳкамланишига, шунингдек, уларни аниқ амалий мазмун билан бойитишга хизмат қилаётганини чуқур мамнуният билан қайд этди.
Ўзбекистон Президентининг 2017 йил апрель ойида Россияга давлат ташрифи, шунингдек, икки давлат раҳбарларининг 10 октябрь куни Сочи шаҳрида МДҲ саммити доирасида ўтган учрашувлари икки мамлакат ўртасида узоқ истиқболга мўлжалланган ва ўзаро манфаатли ҳамкорликни сифат жиҳатидан янги босқичга кўтаргани алоҳида таъкидланди.
Учрашувда Ўзбекистон ва Россия ўртасидаги савдо-иқтисодий, сармоявий ҳамда ҳарбий-техник ҳамкорликни янада ривожлантириш бўйича келишув ва битимларни амалга ошириш масалалари муҳокама қилинди.
Икки мамлакат етакчи корхона ва компаниялари ўртасида истиқболли қўшма дастур ва инновация лойиҳаларини жадал ривожлантиришга қаратилган саноат кооперациясини мустаҳкамлаш муҳимлиги қайд этилди.
Дмитрий Рогозин Ўзбекистон Президенти Шавкат Мирзиёевга самимий қабул учун миннатдорлик билдирди, Россия президенти Владимир Путин ва бош вазири Дмитрий Медведевнинг самимий ва эзгу тилакларини етказди.
Изоҳ (0)