Лас-Вегасда одамларни оммавий равишда ўққа тутган Стивен Пэддокнинг акаси Брюс Пэддок болалар порнографиясини сақлашда айбланиб, ҳибсга олинди, деб ёзади «Газета.ru».
TMZ нашрининг манбалари берган маълумотга кўра, Брюс Пэддокка нисбатан текширув укаси уюштирган отишмадан олдин бошланган. Аммо ҳуқуқ-тартибот органлари гумонланувчининг яшаш жойини ҳалигача ҳам аниқламаган эди.
Пэддокни Лос-Анжелесдаги қариялар ва ногиронлар уйида қўлга олишган. Унинг компьютеридан болалар иштирокидаги порнографик хусусиятга эга материаллар топилган.
Невадалик пенсионер Стивен Пэддок 2 октябрь куни Лас-Вегасдаги кантри-фестиваль меҳмонларига қарата ўт очди. 59 киши ҳалок бўлди; бу АҚШ тарихидаги энг йирик оммавий қотилликдир. Ўзига тўқ ва кантри мусиқа ихлосманди бўлган Педдокнинг ёнидан 23 та қурол ва кўп миқдорда патронлар топилган. Ҳужум учун жавобгарликни ИШИД террорчилик ташкилоти ўз зиммасига олди, бироқ Федерал тергов бюроси (ФTБ) Пэддокнинг диний ақидапарастлар билан алоқадорлигига ишонмаяпти.
Изоҳ (0)