АҚШлик жарроҳлар боши билан қўшилиб кетган Сиам эгизакларини ажратиб олди

АҚШда жарроҳлар боши ва бош суяги билан қўшилиб кетган Сиам эгизакларини муваффақиятли тарзда ажратиб олди, деб ёзади «7mednews.ru».

«Операциядан буён беш ой ўтди, Эрин ва Эбби Делейни ўзларини жуда яхши ҳис қилмоқда ва қайта тикланишда давом этмоқда», — деди шифокор Жесс Тейлор.

1,5 йил аввал туғилган филадельфиялик эгизакларнинг боши ва бош суяги умумий эди. Бир йил олдин жарроҳлар бош суягининг умумий қисмидаги суякларнинг бир қисмини олиб ташлади. Сўнг ичкарига уларнинг ўз бош суякларини силжитадиган махсус ускуна қўйди. Бундай ажратув жуда секинлик билан борди. Бир йил ўтгач, иккала бош суяги бир-биридан бир неча сантиметрга силжиди. Бу шифокорларга болаларнинг бошида қўшимча тери ўстириш, сўнг эса уларни ажратиш имконини берди.

2017 йилнинг июлидаги сўнгги операцияда қизчаларнинг бошидаги ҳар битта томир ажратилди, қон айланиш тизимининг ортиқча тармоқлари олиб ташланди, артериянинг ёрилган қисмлари тикилди, ва миянинг улар учун умумий бўлган қисми олиб ташланди.