Ўзбекистонда 2017 йил 1 октябрь ҳолатига нобанк кредит ташкилотларининг активлари салкам 200 млрд сўмга етди. Бу ҳақда Марказий банк матбуот хизмати маълум қилди.
Мазкур ташкилотлар кредит қўйилмалари қолдиғи 178,4 миллиард сўм, жами капитали 153,4 миллиард сўмни ташкил этмоқда.
Ўзбекистон Президентининг «Республика банк тизимини янада ривожлантириш ва барқарорлигини ошириш бўйича чора-тадбирлар тўғрисида»ги қарорига мувофиқ, 2017 йил 1 октябрдан янги ташкил этилаётган микрокредит ташкилотлари учун устав капиталининг энг кам миқдори 2 миллиард сўм, ломбардлар учун эса 500 миллион сўм миқдорида белгиланди.
Фаолият юритаётган микрокредит ташкилотлари ва ломбардлар 2019 йил 1 январига қадар устав капиталини белгиланган энг кам миқдорга етказишлари лозим.
Маълумот учун, бугунги кунда Ўзбекистонда жами 76 та нобанк кредит ташкилоти фаолият юритмоқда. Уларнинг 30 таси микрокредит ташкилоти, 46 таси ломбарддир.
Изоҳ (0)