Galaxy Note 8 — Samsung’нинг Ўзбекистонда сотилаётган энг қиммат смартфони

Atlas Research & Consulting тадқиқот компаниясининг маълумотларига кўра, Жанубий Кореянинг Galaxy Note 8 флагмани ўз мамлакатида машҳурликка эришишни давом этмоқда. Бу ҳақда DailyComm нашрига таяниб, «Mobinfo.uz» хабар берди.

Экспертларнинг баҳолашича, Samsung ҳар куни ўз мамлакатида 10—20 минг дона янги фаблетларини сотмоқда. Шунингдек, октябрь ойининг иккинчи ҳафтаси натижаларига кўра, Galaxy Note 8’нинг 64 битли версияси Жанубий Кореяда энг кўп сотилган смартфонга айланган — сотилган барча қурилмаларнинг 28,3 фоизини айнан шу модель ташкил қилмоқда. Strategy Analytics экспертларининг фикрича, Samsung компанияси 2017 йилнинг охирига қадар Galaxy Note 8’дан 10 миллион дона сотиши мумкин.

Galaxy Note 8 Ўзбекистонда сотилаётган Samsung смартфонлари ичида энг қиммати дея баҳоланмоқда. Унинг 64 гигабайт ички хотирага эга версияси 6 927 500 сўмдан сотилмоқда. Galaxy S8 смартфонининг нархи эса 5 256 750 сўмни, ўтган йилги Galaxy S7 Edge флагмани эса тахминан 3 993 500 сўмни ташкил этмоқда.

Номи келтирилган қурилмани кўрсатилган нархда сотиб олишга «Дарё» нашри кафолат бермайди. Қурилмалар ва уларнинг нархлари ҳақидаги ахборот фақат танишиш учун тақдим этилган.