MyDay нашри фильмлардаги салбий образлари билан танилган актёр Алихан билан суҳбат уюштирди.
Кинога кириб келишим
Актёрлик соҳасига Америкада ўқиб юрган пайтларим қадам қўйганман. Илк ролим «Ғира-шира» («Сумерки») фильмида эпизодик рол эди. Шу фильм менинг энг катта ютуғим бўлган. Чунки америкалик актёрлар 4—5 йил рол ижро этиб ҳам «Киноактёрлар Гильдияси»га аъзо бўла олмаётган бир пайтда, мен бир ой ичида аъзо бўлганман.
Ролларим
Ташқи кўринишим салбий ролга мос бўлгани учун ва салбий образларни яратиш менда қийинчилик туғдирмагани сабабли кўпроқ салбий ролларни ўйнайман. «Ойқиз эртаги» фильмида ижобий ролда намоён бўлганман ва яқинда экран юзларини кўриш арафасида турган «Темур» фильмида ҳам салбийдан ижобийга ўзгарадиган қаҳрамон образини яратганман. Яна ўзимни бачкана бўлмаган комедия жанрида ҳам синаб кўриш истагим бор.
Охирги ролларим
Рол ижро этган охирги фильмларим – «Дайди», «Темур», «Қотиллар ўйини». «Темур» фильми ҳақида гапирадиган бўлсам, у Ватанга бўлган севги, оилага бўлган муҳаббат тўғрисида. Фильм режиссёри Нодир Мўминов. Бадиий раҳбар Аюб Шаҳобиддинов. Премьера яқин кунларда бўлиб ўтади.
Гонорарим
Америкада «Киноактёрлар Гильдияси»га аъзо бўлишимдан аввал соатига саккиз АҚШ доллари миқдорида гонорар олар эдим. Гильдияга аъзо бўлгач, бир кунлик гонорарим 750 АҚШ долларига кўтарилган. Ўзбекистонда эса бир кунлик суратга олиш ишлари учун 200 АҚШ доллари атрофида гонорар оламан.
Тахаллусим
Тўлиқ исмим Нурмуҳаммад. У жуда ҳам узун бўлгани учун америкаликларга ўзимни таништириш қийинчилик туғдирарди. Улар эслаб қолишлари жуда мушкул бўлган. Алихан эса қисқа ва эсда қоладиган. Тана тузилишим ҳам спортчиларникига ўхшагани учун Алихан дейишим билан уларнинг кўз олдига боксёр Мухаммад Али келарди ва уларга эслаб қолиш анча осонлашарди.
Спорт
Ҳаётимни спортсиз тасаввур қила олмайман. Деярли ҳар куни спорт залига бораман. Актёр бўлиш орзуси туғилгач, ташқи кўринишимга катта аҳамият қаратадиган бўлдим. Ҳар куни тренажёр залига бориб, тинмай шуғулланардим. Шу одатим ҳозир ҳам сақланиб қолган.
Уйланишим
Уйланишим учун ота-онам билан бирга Тошкентдаги бутун таниш-билишлар қиз қидиришган десам, ёлғон бўлмайди. Ростини айтсам, ўз маликамни топгунимга қадар 100 дан ортиқ қизлар билан учрашиб кўрдим, лекин юрагим жиз этадиганини учратмадим. Тақдирни қаранг, бир куни менга бир қизнинг суратини кўрсатишди, лекин суратдаги қизнинг дугонаси эътиборимни тортди. Суриштириб кўрдим ва айнан шу қиз менинг кўнглимдан жой олди.
Оилам
Мен оиламни, рафиқам ва фарзандларимни жуда ҳам қадрлайман. Уларга иложи борича кўпроқ вақт ажратишга ҳаракат қиламан. Кўринишимдан қаттиққўл ва жаҳлдорга ўхшасам ҳам, аслида жуда меҳрибонман.
Рафиқаси Алихан ҳақида
Турмуш ўртоғим жуда ҳам меҳрибон ота. Айниқса қизимизга меҳри бўлак. Ҳозирда бир қиз ва бир ўғилнинг ота-онасимиз. Мен уларга ишонганим туфайли рашк қилмайман. Уларни жуда ҳам ҳурмат қиламан. Қолаверса, улар бизга доимо вақт ажратадилар. Мен уларнинг танлаган касбларини тушунишга ва уларни қўллаб-қувватлашга ҳаракат қиламан.
Изоҳ (0)