Ўзбекистон Республикаси Президенти Шавкат Мирзиёев 19 октябрь куни «Ислом ҳамжиҳатлиги: Ўзбекистон ва Озарбайжон мисолида» халқаро конференциясининг Кавказ мусулмонлари идораси раиси шайхулислом Оллоҳшукур Пошшозода бошчилигидаги иштирокчилар делегациясини қабул қилди, деб хабар бермоқда «АзерТаг».
Учрашувда бугунги кундаги глобал жараёнлар, хавфсизлик ва барқарорликка нисбатан тобора кучайиб бораётган таҳдид ва хатарлар саъй-ҳаракатларни бирлаштириш, конфессиялараро ҳамкорлик ва мулоқотни ривожлантиришни тақозо қилаётгани қайд этилди. Миллатлараро тотувлик ва диний бағрикенгликни янада мустаҳкамлаш, таълимни ривожлантириш ва ёшларнинг ахлоқий тарбиясини юксалтириш масалалари муҳокама қилинди.
Президент Шавкат Мирзиёев Озарбайжонда 2017 йилнинг «Ислом бирдамлиги йили» деб эълон қилиниши ислом дунёси учун муҳим қадам бўлгани ва бу ташаббус бутун мусулмон дунёсида қўллаб-қувватланаётганини таъкидлади.
Шунингдек, бу масала Тошкентда бўлиб ўтган конференцияда қабул қилинган декларацияда ҳам ўз аксини топди.
Давлати раҳбари Ўзбекистон билан Озарбайжон ўртасидаги икки томонлама муносабатларни янада кенгайтириш ва тажриба алмашиш зарурлигини таъкидлади.
Шавкат Мирзиёэв Ўзбекистон Озарбайжоннинг арман-озар, Тоғли Қорабоғ муаммосини ҳал этишда адолатли позициясини қўллаб-қувватлашини таъкидлади ва БМТ Хавфсизлик Кенгашининг қарорларини қўллаб-қувватлаш тарафдори эканлигини алоҳида қайд этди.
Изоҳ (0)