Microsoft асосчиси Билл Гейтс Америка мактабларига 1,7 миллиард доллар сармоя киритиш ниятида. Бу ҳақда Washington Post нашрига таяниб, «РИА Новости» хабар берди.
Нашрнинг ёзишича, пул таълим олишда янги ёндашувларни ишлаб чиқиш ва синовдан ўтказишга қизиққан мактабларни қўллаб-қувватлашга йўналтирилади.
«Ҳар бир талаба бозорда муваффақият қозониш учун мукаммал давлат таълими ва олий маълумот олишлари керак», — дейди Гейтс Кливленддаги мактаб вакиллари билан бўлиб ўтган конференцияда сўзлаган нутқида.
Унинг сўзларига кўра, «бу ерда хайриянинг асосий мақсади бош ҳомий бўлиш эмас, балки одамларнинг фойдаси ва ривожланиши учун ростдан ҳам хизмат қиладиган ғояларни синаб кўриш имкониятини молиялаштириш».
Шу кунга қадар Гейтснинг Тhе Bill & Melinda Gates Foundation хайрия жамғармаси АҚШда даъвлат таълимига 3,4 миллиард доллардан ортиқ маблағ сарфлаган.
1999 йилда Гейтс Microsoft’нинг 16 миллиард долларлик, бир йилдан сўнг 5,1 миллиард долларлик акциясини хайрия қилиб юборган. 1994 йилдан бери эр-хотин Гейтслар 35 миллиард доллар хайрияни амалга оширган.
Изоҳ (0)