Австралиянинг General Motors Holden концерни 20 октябрь куни Аделаидадаги заводини ёпади. Шу билан Австралия автосаноатининг 90 йиллик тарихи ўз якунига етади. Бу ҳақда «РБК» хабар берди.
Завод конвейеридан чиқадиган сўнгги автомобиль қизил рангли Holden VF Commodore седани бўлиши айтилмоқда. Заводда 900 киши ишларди. Австралия автозаводларига бутловчи қисмлар ва жиҳозлар етказиб берувчи ширкатларнинг ҳам ёпилиш хавфи мавжуд.
Бунга қадар Ford, Toyota, Nissan, Mitsubishi, Chrysler ва Leyland каби компаниялари Австралиядаги ўз корхоналарини ёпган эди. Октябрь бошида Toyota Австралиядаги заводини ёпган эди. Оқибатида 2,5 минг киши ишсиз қолди.
Автомобиль ишлаб чиқарувчиларнинг маълум қилишича, Австралиядаги заводлар ишлаб чиқаришнинг қимматлашгани ҳамда хорижий автоконцернлар томонидан бўлган рақобат туфайли ёпилган.
Виктория штати саноат вазири Уэйд Нунаннинг қайд этишича, Австралия машиналарига бўлган талаб тушиб кетган, мамлакат автомобиль саноати давлат грантлари ҳисобига «яшаб» келаётган.
2015 йилда эса ҳукумат автозаводлар учун ёрдам пули ажратишни тўхтатган эди.
Изоҳ (0)