Ишдаги шошқалоқлик унумдорликка қандай таъсир қилади?

Бутун эътиборини, кучини вақт етишмаслигига қаратиш ва доимий равишдаги шошма-шошарлик сурункали хавотирлик ҳолатини келтириб чиқаради. Вақт ўтиши билан бу қарор қабул қилиш қобилиятига путур етказади.

Бизга банд бўлиб кўриниш ёқади

Хатларга жавоб бериш ва ишлар рўйхатидан навбатдаги бандларни ўчириш, бир йиғилишдан бошқасига ўтиш натижасида оладиган энергия оқими бизга жуда ёқади. Биз ўзимизни керакли ҳис қиламиз ва табиийки буни тез-тез ҳис қилишни хоҳлаймиз. Лекин, ҳамма нарсанинг меъёрини билиш керак ва бандликни талвасали шошқалоқлик билан адаштирмаслик керак.

Доимий шошқалоқлик ҳолатида бўлган одам кўпинча ўзининг ҳаракатлари атрофдагиларга қандай таъсир қилаётганини англаб етмайди. Унга ўзи, иложи борича унумлироқ ишлашга интилаётгандек бўлиб туюлади. Аслида эса у ҳамманинг асабига тегади.

Ишдаги шошқалоқликни қандай камайтириш мумкин?

Бизни кўпинча шошилинч ишлар ва қўнғироқлар ўз гирдобига тортади. Бундай ҳолатда бешта вазифа қоидаси фойда бериши мумкин. Унга асосан беш вазифа билан чекланиш керак:

• Ҳозирги пайтда сиз устида ишлаётган икки вазифа;
• Сиз кейин бошлашни режалаштирган икки вазифа;
• Бажаришга улгуролмай қолган вазифалар.

Ҳар бир ходим шу тарзда ўз иш жараёнини ўзи бошқариши, лекин бир вақтнинг ўзида жамоанинг умумий мақсадларини ҳам унутмаслиги керак.

Шунингдек ҳар бир вазифани уни бажариш учун зарур бўладиган соатлар ёки кунлар сони билан баҳолаб кўринг. Шунда сиз ишнинг лойиҳа иштирокчилари учун қулай бўлган маъқул тезлигини ва охирги муддатини танлай оласиз.

Ҳар бир янги вазифа катта мақсадларга мос тушиши, шунингдек сизнинг кундалик ишларингизга ҳам тўғри келиши кераклигини унутманг.

Манба: «1000sovetov.ru»