Агар танаффусдан кейин ҳам ўзингизни ҳорғин, ғамгин ва фойдасиз ҳис қилаётган бўлсангиз, демак сиз нотўғри дам олгансиз. Танаффуслар сизга фойда келтириши учун қуйидаги маслаҳатлардан фойдаланинг.
Ҳар 52 дақиқада танаффус қилинг
Биз кўпинча унумдорликни пасайтирувчи одатларимиз билан курашишга мажбур бўламиз. Масалан, иш билан шуғулланишнинг ўрнига ижтимоий тармоқларни текшириш истаги билан. Бунинг учун кун бўйи диққат-эътиборли бўлиш ва ирода кучини чиниқтириш керак. Иш самарали бўлиши учун эса яхши дам олиш зарур.DeskTime интернет-хизмати томонидан ўтказилган кўплаб тадқиқотлар натижаларига кўра, энг маҳсулдор ходимлар ўз иш вақтларини қуйидаги тарзда тақсимлашар экан: 52 дақиқа диққат билан ишлаш ва 17 дақиқа дам олиш.
Мазкур усулнинг самарадорлиги бир неча сабаблар билан изоҳланади:
- Яқинда танаффус бўлишини билганингиз учун кўпроқ диққат билан ва аниқ мақсадни кўзлаб ишлайсиз.
- Агар сиз тиришқоқлик билан 52 дақиқадан узоқроқ ишласангиз, унда бу иш қобилиятининг йўқолишига олиб келади.
- Бир кунда саккиз соат бир жойда ўтириб ишлаш саломатлик учун зарарли. Иш куни давомида мунтазам равишдаги жисмоний фаоллик саломатликка ҳам, диққатни жамлаш қобилиятига ҳам ижобий таъсир кўрсатади.
Диққатингизни бошқа томонга йўналтиринг
Узлуксиз равишда муаммоларнинг ечими устида бош қотиришнинг ўрнига вақти-вақти билан бу фикрлардан чалғиб туриш ҳам керак.Диққатингизни бошқа бирон нимага йўналтиринг.
Бундай танаффус вақтида иш ҳақида тўлиқ унутиш учун иложи борича бир неча вазифаларни бажариш керак. Шундан кейин сиз янгича куч-ғайрат билан муаммоларни ҳал қилишга киришасиз.
Тоза ҳавога чиқинг
Кўпчилик бутун кунни офисда ўтказишади. Лекин ҳатто бир кунда офисдан ташқарида ўтказилган бир неча дақиқа ҳам кайфиятга ва иш қобилиятига ижобий таъсир қилиши мумкин.Тадқиқотлар табиат қўйнида бўлиш қаттиқ чарчаш билан курашишга ёрдам бериши мумкинлигини исботлади. Қуёш ва тоза ҳавонинг таъсири унумдорликни оширади ва уйқунинг сифатини яхшилайди.
Агар сиз танаффус пайтларида сайр қилишга имконингиз бўлмаса атрофингизга ўсимликлар экилган туваклар қўйинг.
Мия учун фойдали бўлган озиқ-овқатларни истеъмол қилинг
Озиқ-овқатлар организмни мия учун ёқилғи ҳисобланувчи глюкоза билан таъминлайди. Глюкозанинг қондаги ўртача миқдори — 25 г. Агар бу миқдор камайган бўлмаса, мия одатдаги тартибда ишлайди.Олимлар қондаги глюкоза миқдорини оқсилли озиқ-овқатлар ҳам тез кўтаришга қодир эканлигини аниқладилар. Протеин организмимиз учун энергия манбаи бўлиб хизмат қилади. Шунингдек бу тўйимли модда билиш қобилиятини оширади ва бу юқори даражани узоқ муддатгача сақлаб туради.
Кўз учун машқ бажаринг
Кўзлар катта оғирликни бошидан кечиради. Кўпчилик бир кунда 6-9 соат вақтларини компьютер қаршисида ўтказадилар, кўзлар эса бундай ишдан бир-икки соатда чарчаб қолади. Шунинг учун вақти-вақти билан танаффус қилиш ва кўзни экрандан узиб туриш жуда муҳим.Ҳар 20 дақиқада 20 сония давомида ўзингиздан тахминан 6 метр наридаги бирор нарсага қаранг. Бу оддий машқ сизга кўриш қобилиятингизни асрашга ёрдам беради.
Манба: «Лайфхакер»
Изоҳ (0)