Москва Афғонистон Шанхай ҳамкорлик ташкилотига аъзо бўлиб кириши учун саъй-ҳаракат қилмоқда, бироқ бу жараён муайян вақт талаб қилади. Бу ҳақда Россия президентининг Афғонистон бўйича махсус вакили Замир Кабулов маълум қилди, дея хабар беради «Интерфакс».
«Кобул ташкилотга тўлақонли аъзо бўлиб киргунга қадар маълум бир йўлни босиб ўтиши лозим. Бироқ бу рўй бериши учун қўлимиздан келган барча нарсани амалга оширяпмиз. Бу Афғонистонга ёрдам беради», — деди Москвада бўлиб ўтган ШҲТ—Афғонистон контакт гуруҳи учрашуви якунларига изоҳ берган Кабулов.
Россия президентининг ШҲТ ишлари бўйича махсус вакили Бахтиёр Ҳакимовга кўра, учрашувда томонлар келгуси ҳаракатларнинг «йўл харитаси»ни ишлаб чиқиш ҳақида келишиб олди. Контакт гуруҳининг келгуси учрашуви эса 2018 йилда Хитойда бўлиб ўтади.
Афғонистон ТИВ сиёсат ва стратегия департаменти директори Муҳаммад Ашраф Ҳайдарий Кобулнинг контакт гуруҳининг 11 октябрда бўлиб ўтган йиғилишидаги вакили, ташқи ишлар вазирининг ўринбосари Ҳикмат Карзай ШҲТга аъзо давлатларни мамлакатининг мазкур тузилмадаги тўлақонли аъзолигини қўллаб-қувватлашга чақирганини билдирди.
Маълумот учун, ҳозирда кузатувчи мақомига эга бўлган Афғонистон ШҲТга аъзолик учун 2015 йилда талабнома берганди.
Изоҳ (0)