ЎФФ президенти Қатардан қайтмагунича терма мураббийи масаласи ҳам, ўртоқлик ўйини ҳам очиқлигича қолаверади

Ўзбекистон миллий терма жамоасига Рўзиқул Бердиевнинг вақтинча бош мураббий этиб тайинланиши борасидаги хабар расман тасдиқланганича йўқ. ЎФФ матбуот котиби Санжар Ризаев барча масала ташкилот президенти Қатардан қайтиб келгач ҳал бўлишини маълум қилди, деб ёзди «Championat.asia».

Норасмий хабар: «Насаф» устози Рўзиқул Бердиев Ўзбекистон миллий термасига вақтинча бош мураббий бўлади

Бунда матбуот котиби Рўзиқул Бердиев билан вақтинча бош мураббийлик масаласида музокара олиб бораётганини тасдиқлаган. Шу билан биргаликда, агар ЎФФ президенти Умид Аҳмаджонов буни расман амалга оширса, расмий хабар биринчи бўлиб ташкилот сайтига қўйилишини тушунтирган. Режага кўра, президент Тошкентга қайтгач, мажлис ўтказади. Катта эҳтимол билан ўша мажлис сарлавҳадаги саволларга жавоб беради.

Айни вақтда Умид Аҳмаджонов Қатар пойтахти Доҳада бўлиб турибди. У кеча — 17 октябрь куни Қатар Футбол Уюшмаси президенти билан ҳамкорлик масаласида меморандум имзолади.

Аввалроқ, 14 ноябрь куни Ўзбекистон миллий терма жамоаси ФИФА кунларидан унумли фойдаланиб, ўртоқлик ўйинида майдонга тушиши борасида ҳам гап-сўзлар чиққанди. Бунда «Sports.uz» рақиб сифатида Қатарни кўрсатган бўлса, «Championat.asia» БАА варианти ҳақида ёзди. Қайд этиш керак, Умид Аҳмаджонов айнан мана шу икки мамлакат футбол федерациялари билан ҳамкорлик борасида келишувга эришган.

ЎФФ матбуот хизмати бу борада аниқ маълумот бермади, балки бир қатор мамлакатларга ўртоқлик ўйинлари борасида таклифлар юборилганига ойдинлик киритди. Бироқ айнан қайси мамлакатлар экани очиқланмаган.

Аввалроқ ЎФФ миллий терма жамоага бош мураббий тайинлаш масаласида фақат хорижий мутахассислар номзоди кўриб чиқилаётгани ҳақида айтиб ўтганди. Ўша иш амалга ошгунича, Рўзиқул Бердиев термани бошқариб туриши мумкин.