Жанубий Корея расмийлари тергов ҳибсхонасида сақланаётган собиқ президент Пак Кин Хенинг ҳуқуқлари бузилаётгани ҳақидаги айбловларни рад этди. Бу ҳақда «ТАСС» хабар бермоқда.
Пак Кин Хени ҳимоя қилаётган адвокатлар БМТнинг инсон ҳуқуқлари бўйича кенгашига шикоят йўллаш ниятини билдирганди.
Улар 65 ёшли собиқ давлат раҳбари совуқ ва ифлос, доимо ёниб турадиган чироғи ухлашига имкон бермайдиган камерада сақланаётганини даъво қилганди. Шунингдек, у сурункали касалликлардан азоб чекмоқда ва тиббий ёрдам олаётгани йўқ.
Жанубий Корея адлия вазирлиги томонидан 18-октябр, чоршанба куни тарқатилган пресс-релизда бу айбловлар асоссиз эканлиги билдирилган.
«Пак Кин Хе оптимал ўлчамдаги, телевизор, шкаф, туалет билан жиҳозланган ва поли иситиладиган камерада сақланмоқда. Мамлакатнинг собиқ етакчисига илтимосига кўра йиғма каравот берилган. Шунингдек, у ҳибсхонада ишлаётган шифокорлардан мунтазам равишда тиббий ёрдам олмоқда ва икки маротаба шаҳарда жойлашган касалхонага олиб борилди. Чироқ эса қўриқчилар маҳбуслар нима билан шуғулланаётганини кўриб туриши учун кечки пайт доим ёниқ туриши лозим», — дейилади вазирлик хабарида.
Изоҳ (0)