Google компанияси Google Maps дастурининг янгиланган версиясини тақдим этди, эндиликда фойдаланувчилар Қуёш тизимидаги сайёраларга ва уларнинг йўлдошларига ташриф буюриши мумкин. Бу ҳақда компаниянинг блогига асосланиб, TJournal хабар берди.
Google Maps’да умумий миқдорда 16 та осмон жисми мавжуд: Меркурий, Венера, Ер, Ой, Марс, Серера митти сайёраси, Плутон, Юпитер йўлдошлари — Ио, Европа ва Ганимед, Сатурн йўлдошлари — Мимас, Энцелад, Диона, Рея, Титан ва Япед.
Сайёралар ҳамда йўлдошлар юзасида уларда жойлашган объектлар номи кўрсатилган. Уларнинг устига босиб объектнинг аниқ координаталари ҳамда номининг келиб чиқиши ҳақида маълумотларга эга бўлиш мумкин.
Компания блогида таъкидланишича, харитани яратишда Cassini зонди томонидан олинган суратлардан фойдаланилган. Шунингдек, харитани яратишда астрономик рассом Бьорн Йонссон ҳам иштирок этган.
Шу билан бирга, харитада 2017 йилнинг июлида Google Street View’да пайдо бўлган Халқаро космик станция суратлари ҳам мавжуд.
Изоҳ (0)